Privatdetektivserië sinn e beléifte Genre. Vum Sherlock Holmes, Magnum bis bei de Monk, kenne mir se all. Den John Sugar seet iech warscheinlech näischt, mä dir fannt en op Apple+.

28/05/2025 Série iwwer Sérien (Sugar)

Den John Sugar lieft zu L.A. an ass drop spezialiséiert vermësste Persounen ze fannen, dat aus perséinleche Grënn. Hie kritt hei den Optrag fir d'Enkelin vun engem berüümten Hollywood-Produzent ze fannen. Méi gitt dir am Trailer gewuer.

Gespillt gëtt de Sugar vum Hollywood-Star Colin Farrell, deen d'Serie och mat produzéiert huet. Fir hie soll se en Hommage un d'50er-Jore-Filmer sinn an dofir ass se an engem ganz spezielle Stil gedréit. Et ass e Gesamtkonschtwierk mat extreemer Léift zu Detailer: d'Musek schaaft d'Atmosphär vun Noir-Filmer a fir kuerz Momenter si schwaarz-wäiss Zeenen aus ale Filmer dotëscht geschnidden. Als speziellen Twist huet een de Sugar selwer als Erzieler, mir sinn a sengem ënnere Monolog dobäi, dat huet z.Bsp. och bei House of cards immens gutt funktionéiert.

E klenge Kritikpunkt ass vläicht de luesen Erzieltempo an de spezelle Revirement zum Schluss huet net jidderengem gefall. Mä Fane vum Privatdetektivgenre solle sech Sugar op Apple+ net entgoe loossen.