E Mëttwoch de Moie war d'Presidentin vu Pro-Sud, dem regionale Syndikat fir d'Entwécklung vum Süden, eis Invitée vun der Redaktioun.

En Zesummenhalt wier hir wichteg, seet déi nei Presidentin vum regionale Syndikat mat den 11 Süd-Gemengen. D'Anouk Boever-Thill war e Mëttwoch de Moien eis Invitée vun der Redaktioun.

De Pro-Sud hätt si nach ëmmer interesséiert a faszinéiert. Et hätt een immens vill Potential an der Südregioun.

De Pro-Sud war nach ëmmer ganz politesch. D'Anouk Boever-Thill ass CSV-Conseillère zu Monnerech. Si huet sech am Vott géint den Dan Biancalana LSAP duerchgesat. Dat Politescht sollt villäicht net sou sinn, mä et géif wierklech ëm d'Gemengen allgemeng goen.

Grad well si net Deputée-Maire ass, hätt si och villäicht méi Zäit a villäicht och manner Interessekonflikter.

De Pro-Sud wëll si an der Kontinuitéit weider leeden. Hire Virgänger, de Roberto Traversini, hätt am Gemengesyndicat eng gutt Aarbecht geleescht.

E groussen a wichtege Projet ass d'Kandidatur bei der Unesco, fir datt de Süden Biosphärereservat gëtt. Den Dossier gouf eragerecht. Enn Juni kritt Pro-Sud d'Äntwert, ob een de Label kritt oder net.

Invité vun der Redaktioun: Anouk Boever-Thill

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.