E Freideg de Moie war d'Presidentin vun der Salariatskummer an dem Onofhängege Gewerkschaftsbond eis Invitée vun der Redaktioun.

De Sozialdialog huet sech zanter dem Ufank vum Joer, zanter der Pandemie nach méi verschlechtert, dat sot eis Invitée vun der Redaktioun, d'Presidentin vun der Salariatskummer an dem Onofhängege Gewerkschaftsbond Nora Back um Freideg de Moien. D'Regierung géif blockéieren, fir sech mat de Sozialpartner un een Dësch ze sëtzen. Dobäi wier d'Tripartite d'Kriseninstrument par excellence. Zanter der leschter Ronn am Juli zejoert wier een awer ëmmer nëmme vertréischt ginn. Antëscht leie souguer Gewerkschaften a Patronat op enger Linn. D'Patronat, dat et zejoert laang arrangéiert huet, datt keng Tripartite aberuff gouf, hätt elo am Kader vum "Semestre européen" bedauert, datt de Sozialdialog därmoossen ofgeflaacht a just op eng Alibiprozedur reduzéiert gouf, sou d'Nora Back. Déi dräi Acteure missten dréngend zesummen iwwer politesch Prioritéiten no der Kris diskutéieren.

Mir wëlle gär mat der Regierung eis Visioune fir d'Zäit no der Kris diskutéieren

D'OGBL-Presidentin fuerdert e soziale Wee eraus aus der Kris. D'Interesse vun de Leit, déi schaffen, missten dobäi respektéiert ginn a politesch Decisioune geholl ginn, déi verhënneren, datt Ongläichheeten no der Pandemie nach weider zouhuelen. D'Regierung hätt wuel vill Sue fir d'Pandemiebekämpfung investéiert, déi dozou bäigedroen hunn, datt d'Situatioun zu Lëtzebuerg manner desastréis ass wéi am Ausland, mä si hätt nach net genuch verhënnert kritt, datt d'Schéier tëscht Aarm a Räich an der Pandemie weider ausernee geet. Den OGBL hätt d'Hëllefe fir d'Betriber ëmmer ënnerstëtzt, ma just an engems eng Aarbechtsplazgarantie gefuerdert. E Betrib, dee vum Staat gehollef kritt, dierf seng Leit net entloossen. An den nächste Méint misst an deem Kontext verstäerkt op d'Instrument vum "plan de maintien dans l'emploi" zréckgegraff ginn. Notamment am Horeca-Secteur misst assuréiert ginn, datt d'Aarbechtsplazen och an Zukunft ofgeséchert sinn.

D'Nora Back huet sech fir méi Efforten an der Logementspolitik ausgeschwat, fir eng aner Ëmverdeelung, méi eng gerecht Steierpolitik. D'Revenue misste manner besteiert ginn, d'Kapital méi. Spannend wier, sou d'Presidentin vun der Salariatskummer, datt sech haut souguer e Gremium wéi den Internationale Wärungsfong staark mécht, fir méi e gerechte Steiersystem weltwäit.

Ëmmerhi wär Lëtzebuerg an der Zuel vu Leit, déi aarm sinn, obwuel se schaffen, Spëtzereider an Europa. Grad ewéi beim Aarmut vun elengerzéienden Elteren. An engem Land wéi Lëtzebuerg wier dat e Skandal.

Betriber solle Schnelltestcampagne mat Personaldelegatioun organiséieren

Mam Aarbechtsminister Dan Kersch hätt den OGBL e gudden Austausch, wat d'Campagne vun de Schnelltester fir Entreprisen ugeet, déi den hallwe Mee ulafe soll. Dat wier eng gutt Mesure, sou d'Invitée. Et géif een den Ament zesumme kucken, wéi een dat kann organiséieren. Dat kéint awer nëmme klappen, wann dat zesummen ugepaakt gëtt a wann d'Personaldelegatiounen an de Betriber mat abezunn ginn, betount d'Nora Back. Och fir ze verhënneren, dass awer indirekten Drock op d'Mataarbechter gemaach gëtt. D'Tester solle fräiwëlleg bleiwen. An d'Betriber sollen hir Testcampagne no hiren eegene Besoinen organiséieren.

1. Mee-Cortège

Och dëst Joer fält dat grousst Fest vun der Aarbecht an de Kulturen an der Abtei Neimënster wéinst Corona aus.
Dofir huet den OGBL decidéiert, eng Traditioun nees ze beliewen. E Cortège zu Esch an eng Ried fir den 1. Mee. D'Nora Back huet betount, de ganzen Evenement géif am Respekt vun de sanitäre Mesuren oflafen.

Invité vun der Redaktioun: Nora Back

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.