Bei der Nacht van Woerden an Holland ass d'Marie Schreiber den Owend hannert der hollännescher Championne Lucinda  Brand op déi excellenten 2. Plaz gefuer.

Si huet d'Konschtstéck fäerdeg bruecht, fir d'Weltmeeschterinn Fem Van Empel hannert sech ze loossen. 
 
D'Nacht van Woerden gëtt traditionell owes gefuer. Beim Depart aus der éischter Réi hat d'Marie Schreiber e puer Plaze verluer an huet sech op dem séiere Parcours mat ville Kéieren am Laf vum 2. Tour no vir geschafft. Am 3. Tour huet si sech un d'Spëtzt gesat a probéiert, déi aner ze testen. Brand, Van Empel, Vas an Van der Heijden sinn awer dru bliwwen.

No e puer Positiounswiessel ass d'Entscheedung an de leschten zwee Tier gefall. Nodeems d'Lëtzebuerger Championne nach eemol forcéiert hat, huet d'Fem van Empel e Feeler gemaach an huet misse lassloossen.

D'Entscheedung ëm d'Victoire ass tëscht Brand a Schreiber gefall. Am leschten Tour hat déi hollännesch Championne e bësse méi Reserven an ass mat enger klenger Avance virum Marie Schreiber iwwer d'Arrivée gefuer. D'Fem Van Empel ass als Drëtt mat op de Podium geklommen.

E Sonndeg geet d'Marie Schreiber beim internationale Cross zu Conter un den Depart, eng Woch drop start si da bei der Europameeschterschaft a Spuenien.

Iwwersiicht mat de Resultater

1 BRAND Lucinda
2 SCHREIBER Marie 0:05
3 VAN EMPEL Fem 0:11
4 VAS Blanka Kata 0:14
5 VAN DER HEIJDEN Inge 0:20
6 VAN ALPHEN Aniek 0:55
7 WIEBES Lorena 1:33
8 BAKKER Manon ''
9 VERDONSCHOT Laura 1:38
10 BARONI Francesca 1:44