Däitschland huet sech doheem duerch Goler vu Bischof a Wirtz mat 2:0 géint Serbien duerchgesat a kann domadder déi éischt Victoire an dëser Campagne feieren. Géint Holland gouf et jo just e Gläichspill a géint Griicheland hat ee verluer.
Am Match tëscht Dänemark a Portugal sinn net manner wéi 6 Goler gefall. Am Virfeld gouf et jo grouss Diskussiounen, nodeems de Cristiano Ronaldo d'Nationalekipp verlooss hat. Dat war awer séier vergiess, wéi de Match bis ugepaff war, well et war e Match, an deem vill geschitt ass. Portugal hat den 0:1 geschoss, ma Dänemark konnt nëmmen 10 Minutte méi spéit ausgläichen. Allerdéngs huet d'Freed net laang gehalen, well schonn nees just 2 Minutte méi spéit war Portugal nees 2:1 vir. Mat deem Resultat ass et och an d'Paus gaangen. An der 53. Minutt konnt Dänemark duerch den Höjlund op 2:2 ausgläichen. Vitinha a Joao Felix hunn awer an der 67., respektiv der 87. Minutt den Deckel drop gemaach a Portugal feiert am 3. Match déi 3. Victoire.
Weider Resultater:
Aserbaidschan - Liechtenstein 0:0
Griicheland - Holland 2:2
Wales - Norwegen 2:1
Israel - Kosovo 0:0
Irland - Éisträich 2:2
Malta - Gibraltar 1:1
E Freideg kënnt et ënnert anerem zum Duell tëscht Frankräich an Italien, dat um 20:45 Auer. D'Belsch kritt et mat der Tierkei ze dinn a Bosnien spillt géint Schweden.
E Samschdeg dann ass Lëtzebuerg auswäerts géint Estland gefuerdert.
