An der Serie A am Volleyball huet de Kamil Rychlicki mat senger Ekipp Luve Cibitanova géint Milano gewonnen.

An der éischter italienescher Divisioun am Volleyball gewënnt de Nationalspiller Kamil Rychlicki mat Luve Civitanova mat 3:0 an de Sätz géint Milano. No 3 Victoiren ass de Lëtzebuerger mat senger Ekipp momentan de Leader vun der Serie A.

An der däitscher Pro A Divisioun am Basket klappen d'Gladiators Tréier mam Thomas Grün d'Team Ehingen Urspring mat 76:69. De Lëtzebuerger konnt 7 Punkten zu der Victoire bäidroen a stoung insgesamt 17 Minutten a 27 Sekonnen um Terrain a gouf an den däitsche Medien fir seng gutt Defense-Aarbecht gelueft. En Donneschdeg den Owend spillen d'Gladiators um 19.30 Auer géint Schalke.

Bei den Dammen an der éischter däitscher Divisioun am Basket verléieren d'XCYDE Angels mam Magalie Meynadier däitlech mat 56:81 géint Wasserburg. Domat steet d'Lëtzebuergerin mat hirer Ekipp no 6 Spilldeeg op der 4. Plaz.

Am Volleyball verléiert de Chris Zuidberg mat Waremme an der EuroMillions League an der Belsch mat 1:3 géint Achel. Nodeems Achel sech den éischte Saz mat 25:17 séchere konnt, war et am zweete Saz d'Ekipp vum Lëtzebuerger, déi d'Iwwerhand behalen haten. Duerno konnte si awer net méi mat Achel mathalen, a sou verléiere si mat 1:3 an de Sätz.