Iwwerdeems huet Düsseldorf am Rhein-Derby géint Köln 2:0 gewonnen.

Bundesliga

Augsburg - Schalke 2:3
1:0 Baier (38'), 1:1 Lichtsteiner - Selbstgol (45'+1), 2:1 Finnbogason (60'), 2:2 Kabak (71'), 2:3 Harit (82')

An der Owespartie vum Sonndeg krut et Augsburg mat Schalke ze dinn. S04 hat d'Chance mat engem Dräier op eng international Plaz ze sprangen, et waren awer d'Lokalhären, déi an der 38. Minutt de Score opgemaach huet. Kuerz virum Téi ass Schalke awer zeréck an de Match komm, dat wéi de Lichtsteiner no engem Fräistouss de Ball am eegene Filet ënnerbruecht huet.

No dem 1:1 an der Paus sinn an der 2. Hallschecht weider Goler gefall. D'Heemekipp konnt op Eelefter hin den 2:1 markéieren, nodeems den Arbitter Ittrich de virtuellen Onparteischen ageschalt hat. Déi lescht 20 Minutten huet awer de Schalker gehéiert. D'Éischt huet de Kabak mam Kapp getraff a wéineg méi spéit huet sech den Harit mat engem Solo duerchgesat an op 3:2 gestallt. S04 steet dann elo nom 10. Spilldag op Plaz 6.

Düsseldorf - Köln 2:0
1:0 Hennings (38'), 2:0 Thommy (61')

Datt an der Reegel am Rhein-Derby tëscht Fortuna Düsseldorf a Köln Musek ass, war virdru scho gewosst. Virum Match gouf et awer eng Provokatioun vun der Säit vun den Düsseldorfer, wéi 3 Geessekäpp am Kölner Stadion ënnerbruecht gi sinn. Et ass jo gewosst, datt de Geißbock d'Maskottche vum FC ass - eng degueulasse Provokatioun deemno.

© afp

Nieft dem Geraibers um Terrain gouf awer och Futtball gespillt. Do virdru gouf et awer een Eelefter fir d'Fortuna, dësen huet den Hennings kuerz virum Téi verwandelt. Déi Kölner waren an der 2. Hallschecht gefuerdert, huet d'Ekipp vum Kapitän Hector nach eng Kéier zeréck an d'Partie wëlle fannen - et koum awer anescht. Düsseldorf huet nämlech op der Stonn op 2:0 erhéicht an domat blouf dem FC just nach eng hallef Stonn fir de Match ze dréien.

Um Enn ass et awer mol net méi fir den Uschlosstreffer duergaangen, soudatt d'Fortuna den Erfolleg am Rhein-Derby feiere konnt.

Premier League

Everton - Tottenham 1:1
0:1 Alli (63'), 1:1 Tosun (90'+7)

No enger Partie, an deenen d'Spectateuren am Goodison Park zu Liverpool an den éischte 45 Minutte keng Goler gesinn hunn, sinn d'Goler an der 2. Hallschecht gefall. 3 Minutten no der Stonn huet den Dele Alli ee Solo duerch d'Ofwier vun Everton gemaach an den 1:0 verwandelt. Eng 10 Minutte viru Schluss ass den Heung-Min Son op Säite vun de Spurs vum Terrain geflunn.

Everton huet net opginn an et ass der Ekipp vum Trainer da Silva an der 7. Minutt vun der Nospillzäit gelongen, op 1:1 ze setzen.