Och fir en Donneschdeg stoungen nees 4 Matcher um Programm.

Futtball-WM 2022 - Rep. Guy Seyler

D'Schwäiz huet géint Kamerun gespillt. Uruguay krut et mat Südkorea ze dinn. Portugal huet géint Ghana gespillt a Brasilien huet géint Serbien missen untrieden.

Grupp G

Schwäiz - Kamerun 1:0
1:0 Embolo (48')

Am éischte Match vum Donneschdeg krut d'Schwäiz et am Grupp G mam Kamerun ze dinn. An der éischter Hallschent haten d'Schwäizer zwar méi Ballbesëtz, konnten awer wéineg mat dësem ufänken. Kee vun de Schwäizer hiren 3 Schëss ass op de Gol gaangen. Kamerun war dogéint däitlech méi effizient an huet et zu 5 Ofschlëss bruecht. Ma et sollt mat engem 0:0 an d'Paus goen.

An der 48. Minutt hat et dunn eng éischte Kéier am Gol vu Kamerun geschellt. Iwwert de Vargas an de Freuler koum de Ball bei de Shaqiri op Riets. Deen huet de Ball flaach an d'Mëtt bruecht an den Embolo huet äiskal markéiert. Den Onana am Gol vu Kamerun konnt näischt maachen. Duerno ass de Kameruner quasi näischt méi gelongen. D'Schwäizer hu sech nach eng Partie Chancen erausgespillt, vun deenen allerdéngs keng eragaangen ass. De Match ass deemno mat 1:0 op en Enn gaangen.

Brasilien - Serbien 2:0
1:0 Richarlison (63'), 2:0 Richarlison (73')

Um leschte Match vum sougenannten éischte Spilldag tëscht Brasilien a Serbien war et un de Brasilianer fir hirer Favoritteroll gerecht ze ginn. An den éischte 45 Minutte konnten d'Brasilianer dës Erwaardungen allerdéngs nëmmen esou hallef erfëllen. Wuel ware si déi méi aktiv a spillbestëmmend Ekipp, mä eppes Konkretes virum Gol vun de Serbe konnt dobäi net eraussprangen. Just an der 35. Minutt sinn d'Brasilianer eng Kéier geféierlech virum serbesche Golkipp opgedaucht. Dëst wou de Paqueta de Raphinha schéin an Zeen gesat huet. Mä dem Raphinha säi Schoss war ze zentral, soudatt de Milinkovic-Savic am Gol vun de Serben de Ball opfänke konnt. D'Serben dogéint hu sech méi op d'Verdeedege fokusséiert a konnte seele bis guer net geféierlech no vir spillen. Deemno ass et mat engem gerechten 0:0 an d'Paus gaangen.

Nom Téi waren et d'Brasilianer, déi däitlech besser an de Match komm sinn. Si hunn déi serbesch Defense ferm ënner Drock gesat an deen een oder anere geféierleche Schoss a Richtung serbesche Gol lassgelooss. Dobäi huet ënnert anerem den Alex Sandro an der 60. Minutt mat sengem Schoss de Potto getraff. An der 63. Minutt sollt dunn de Ball de Wee an de serbesche Filet fannen. Dëst nodeems de Richarlison en Ofpraller vum Vinicius Jr. ausgenotzt huet an hien de Ball an den eidele Gol gedréckt huet. An der 73. Minutt sollt de Richarlison dunn fir déi zweete Kéier zouschloen a per Säitfallzieher op en 2:0 fir seng Faarwen erhéijen. D'Brasilianer hunn d'Serben doropshi guer net méi an de Match komme gelooss an haten an der 80. Minutt duerch de Casemiro esouguer d'Chance op 3:0 ze erhéijen. Allerdéngs ass dem Casemiro säin Distanzschoss op der Lat gelant, soudatt et bei engem 2:0 bliwwen ass a Brasilien eng verdéngte Victoire feiere kann. D'Serben dogéint musse sech an den nächste Matcher däitlech steigeren, wa si op der Weltmeeschterschaft nach e Wiertche matschwätze wëllen.

Grupp H

Uruguay - Südkorea 0:0

Am Grupp H huet Uruguay géint Südkorea gespillt. An enger relativ ausgeglachener éischter Hallschent waren et d'Südkoreaner, déi déi gréisste Golchance haten. Den Ui-Jo Hwang stoung an der 34. Minutt fräi virum Gol, huet awer aus 10 Meter driwwer geschoss.

An der zweeter Hallschent krut Uruguay dann no an no ëmmer méi Undeeler vum Spill, konnt sech awer keng gréisser Chancen erausspillen. Esou war et de Valverde, deen de Ball an der 89. Minutt aus der Distanz op de Potto vum südkoreanesche Gol geschoss huet. Vu Südkorea huet ee spilleresch net méi vill gesinn. Béid Ekippe waren iwwer wäit Strecken net bereet, den néidege spilleresche Risiko anzegoen, sou dass de Match mat engem 0:0 op en Enn geet.

Portugal - Ghana 3:2
1:0 Ronaldo per Eelefmeter (65'), 1:1 Ayew (73'), 2:1 Félix (78'), 3:1 Leão (80'),  3:2 Bukari (89')

Am zweete Match am Grupp H war Portugal um 17.00 Auer op Ghana getraff. An der éischter Hallschent krut een hei wéineg Spektakuläres gebueden. Portugal huet d'Spill iwwer wäit Strecken dominéiert, konnt sech awer géint e Géigner, dee ganz Déif stoung nëmmen eng gutt Chance erausspillen. Deemno ass et mat engem 0:0 an d'Paus gaangen.

An der zweeter Hallschent huet dann och de Ghana méi matgespillt. Ma vun der 62. Minutt un sollt Feier an d'Partie kommen. Do huet den Arbitter nämlech op Eelefmeter decidéiert, nodeems de Ronaldo am Strofraum vum Salisu touchéiert gouf. Nodeems keng Reklamatioun vum VAR komm, huet de Ronaldo dann an der 65. Minutt vum Punkt markéiert. Ghana huet sech awer net schockéiere gelooss a konnt an der 73. Minutt no engem Ofwierfeeler vun de Portugisen duerch den Ayew ausgläichen. 5 Minutten drop sinn d'Portugisen dunn duerch de João Félix nees a Féierung gaangen an nëmmen 2 Minutte méi spéit huet de Leão den 3:1 markéiert. Ma Ghana sollt et nach eng Kéier spannend maachen. An der 89. Minutt kann de Bukari no enger Flank per Kapp zum 3:2 verkierzen. An der 7. Minutt vun der Nospillzäit spillen d'Ghanaer esouguer nach e Konter zu Enn. De Bukari konnt de Ball awer net am Gol ënnerbréngen, sou dass Porutgal dëse Match um Enn mat 3:2 fir sech decidéiert.