De féiere Profiboxer René Weller ass am Alter vun 69 Joer gestuerwen. Beim Däitsche war 2014 eng Demenz diagnostizéiert ginn a e wier schonn e Méindeg un de Suitte vun der Krankheet gestuerwen. Dat huet seng Fra der “Bild-Zeitung” confirméiert.
De René Weller huet 1983 de WM-Titel am sougenannten “Superfedergewicht” bis 58,967 Kilo gewonnen an dat Joer duerno fir d’éischte Kéier den EM-Titel am sougenannten “Leichtgewicht” bis 61,235 Kilo. No senger Karriär war de Boxer e puer mol am Konflikt mam Gesetz a souz ënner anerem och bal fënnef Joer am Prisong wéinst Kokain-Handel an onerlaabtem Waffebesëtz.
Méi spéit war de René Weller zesumme mat senger Fra Maria och ëmmer nees an däitsche Reality-Shows ze gesinn. Si huet hire Mann déi lescht Joren doheem gefleegt. Der “Bild” sot dem René Weller seng Fra an enger Reaktioun op hirem Mann säin Doud: “Ech hunn hie goe gelooss an et war an de leschte Woche ganz schwéier. Hien huet gejaut, hien hat Péng.”
