Et ass de leschte grousse Rendez-vous vun der Saison fir déi jonk Futtballspiller an de Spaass mam ronne Lieder ass hei virrangeg. De Gilles Tricca war beim leschten Highlight vun der Saison mat derbäi.
Ugemellt waren 314 Ekippen an deemno waren och méi wéi 3.000 Kanner iwwer de ganzen Dag verdeelt an den Däichwisen. Datt do eng enorm Organisatioun derhannert stécht, läit op der Hand. An och wann d’Resultater eigentlech bei dësem Event net wichteg sinn, muss de ganzen Oflaf vum Tournoi organiséiert sinn.
Bei de Meedercher gouf an 2 Kategorië gespillt, Fillettes a Jeunes Filles. Fir d‘Responsabel vun der Dammesektioun Carine Nardecchia ass et wichteg, datt d’Meedercher bei dësem Dag derbäi sinn.
Bei de Jonge gouf an de Kategorië Bambinis bis Minimes gespillt. Ënnert dem Stréch ass et wichteg, datt vill Jonker d’Freed um Futtball fannen. An och dës Editioun huet nees e Rekord geschloen. Net manner wéi 854 Matcher si gespillt ginn an 90 Arbittere waren am Asaz.
No all de Jore kritt een als Organisateur zwar eng gewësse Routine an awer stellt esou en Evenement eng grouss Erausfuerderung duer, well et gëtt net nëmmen um Terrain gekickt, mee och niewendru muss fir Animatioun gesuergt ginn. An dat huet dëst Joer och erëm geklappt.
