De Contournement, dee schonn zanter Jore geplangt ass a Mëtt des Joers sollt ugefaange gi mat bauen, steet elo awer erëm op der Kipp.

Et feelt eng aktuell Ëmwelt-Autorisatioun. Dat hunn déi Responsabel vum Schäfferot e Méindeg vum zoustännege Minister François Bausch erkläert kritt. Ma fir dës Autorisatioun ze kréien, missten nei Etüde gemaach ginn, déi sech wäerten iwwert Méint zéien. Ënnert anerem misst gekuckt ginn, wéi eng Villercher iwwert dëst Gebitt fléien.

Beim Dippecher Schäfferot stéisst dës Noriicht op grousst Onverständnes. No ronn 15 Joer, an deenen un deem Projet geplangt gouf, muss de Chantier elo nach eng Kéier no hanne verréckelt ginn. An dat fir op d'mannst ee Joer, esou den opbruechten Dippecher Schäffen an Deputéierte Max Hahn.

Max Hahn: „Mir hunn eigentlech schonn 2012 domat gerechent, dass de Bau géif ugoen, esou war et nämlech eigentlech geplangt. Mëtt des Jores sollt endlech ugefaange gi mam Bagger. Elo fänke mer dann elo mol un, Etüden ze maachen, fir d'Villercher ze zielen. Onverständlech fir eis. Hei geet et och ëm d'Gesondheet vun eise Matbierger, déi do laanscht deen Tracé an iwwerall ronderëm wunnen, wou d'Stroossen als Schläichweeër benotzt ginn an och natierlech d'Utilisateure vun der Dräikantonsstrooss. Wéi gesot, ganz, ganz grav Noriicht fir eis hei als Schäfferot."

D'Autorisatioun, déi 2010 eng éischte Kéier ausgestallt gouf, huet duerno all zwee Joer mussen erneiert ginn. Déi lescht ass deemno 2018 ausgelaf an dunn net méi verlängert ginn. Dat, well d'Demande, fir se ze verlängeren, zwee Méint ze spéit agereecht gouf. Ausserdeem misst eng Etüd gemaach ginn, fir ze kucken, wéi eng Villercher iwwert dat Gebitt fléien. Do wier nämlech an Tëschenzäit eng sougenannt „Important Bird Area". Dem Dippecher Schäfferot no géif et déi allerdéngs schonn zanter 2012 ginn. Den zweet Schäffe Jean-Paul Bleser hält dës Decisioun egal wéi fir komplett onverhältnesméisseg.

Jean-Paul Bleser: „Ech denken, hei ass et, dass Vulle gezielt ginn a gekuckt gëtt, wéi eng Vullen iwwert deem Gebitt ronderëmfléien. Onofhängeg dovunner, wéi vill Awunner dass an deem Gebitt mussen all Dag hir Fënsteren an Dieren zoumaachen, well se et vu Schuedstoffer net méi an hire Wunnengen aushalen. Deemno ass een ëmsou enttäuscht, wann ee kuckt, wéi wäit deen Dossier do fortgeschratt ass."

An den Ae vun der Buergermeeschtesch Manon Bei läit d'Responsabilitéit hei kloer beim Bauhär, dat heescht de Ponts et chaussées, an deemno beim Ministère vum François Bausch, D'Gemeng hätt op jiddwer Fall kee Feeler gemaach. Et géif een zanter Joren op dee Contournement waarden, deen immens wichteg wier, fir d'Liewensqualitéit vun den Dippecher Awunner.

Manon Bei: „Wien ass de Maître d'ouvrage? Wie mécht et? Si. Also hu si ze kucken... Hie weess jo och vläicht net, wat a sengen Administratiounen ofleeft. Mä seng Administratiounen hunn ze kucken, dass all jeeweileg Autorisatiounen do leien."

An de Spëtzestonne sinn d'Barrièren op der Streck, déi mam Contournement soll entlaascht ginn, bis zu 40 Minutten an der Stonn zou. D'Konsequenz si riseg Stauen, ëmmerhi fueren eng 10.000 Autoen am Dag iwwert d'Dräikantonsstrooss. Eng immens Belaaschtung fir d'Leit, déi do wunnen. Entspriechend grouss dann och de Frust elo bei deene Gemengeresponsabel.

E Mëttwoch koum dunn och eng Fuerderung vum Schäfferot vun der Gemeng Recken op der Mess. Si bieden de François Bausch, den Delai fir den Ufank vun den Aarbechten, deen ausgemaach gouf, ze respektéieren. Weider maache si och opmierksam op d'Problemer mat der Barriär zu Dippech. An deem Kontext wéilte si séier ee Rendez-vous mam Transportminister an der Gemeng Dippech.

Reaktioun François Bausch

Vu Säit vum Transportministère fënnt een et enttäuschend, datt de Bau vum Dippecher Contournement op en neits muss verréckelt ginn. 2015 scho wiere vum Ëmweltministère déi Vulleschutzgebitter ausgewise ginn, dorënner och Dippech-Récken.

Kritik kënnt hei vum Minister François Bausch, datt een d'Autorisatioun fir de Bau vum Ëmweltministère 2016 verlängert kritt huet, ma een net drop opmierksam gemaach gouf, datt déi Bestandsopnam vun de Vullenaarte misst gemaach ginn.

François Bausch:Et ass u sech kee Problem. Mir kënnen déi Strooss nach ëmmer bauen. Do muss elo eng genau Bestandsopnam gemaach ginn, wat fir eng Vullenaarten do fléien. Op dëser Basis mussen da Kompensatiounsmoossnamen decidéiert ginn. Wa mer 2016 schonn avertéiert gi wieren, dann hätte mer dat natierlech direkt gemaach an hätten déi elo virleien.“

Den Transportministère geet dovun aus, datt Enn September d'Etüd ofgeschloss misst sinn. No enger Réunion Publique kéint een dann Enn dës Joers d'Ausschreiwunge fir de Contournement lancéieren.

© Didier Weber/RTL

Reaktioun Carole Dieschbourg

Mëtt vum Joer sollt mam Bau vum Contournement Dippech-Gare ugefaange ginn. Dorausser gëtt allerdéngs elo näischt. Zanter Mäerz 2018 feelt eng gülteg Ëmwelt-Autorisatioun. Virun e puer Joer goufe Vulleschutzgebidder vum Ëmweltministère festgeluecht. A genee an esou eng Zone géif den Tracé vum Contournement falen. Erklärunge vun der Ëmweltministesch Carole Dieschbourg um Mikro vum Christophe Hochard:

Contournement Dippech-Gare: Carole Dieschbourg reagéiert
Den Tracé vum Contournement fält an e Vulleschutzgebitt, esou d'Ëmweltministesch.

Vun engem Fiasko fir de Schäfferot, schwätzt d'Biergerinitiativ a fuerdert an engem Bréif un den Dippecher Schäfferot, datt de Gemengerot am Detail informéiert gëtt.