Lescht Joer si bei Verkéiersaccidenter an Däitschland insgesamt 27.260 Kanner ënner 15 Joer verongléckt, dorënner 53, déi ëm d'Liewe komm sinn.

D'Zuel vu Kanner, déi bei sou Accidenter ëm d'Liewe komm sinn, ass dobäi bannent engem Joer vu 44 op 53 geklommen, wéi d'Bundesamt fir Statistik en Donneschdeg zu Wiesbaden matgedeelt huet.

2024 ass domat all 19 Minutten e Kand am Stroosseverkéier verongléckt. D'Gesamtzuel vun Accidenter mat Kanner huet sech am Verglach zum Joer virdru kaum geännert.

No engem markante Réckgang um Ufank vun der Covid-Pandemie war d'Zuel 2022 an 2023 nees geklommen. Besonnesch Kanner tëscht sechs a 14 Joer veronglécken dacks um Wee an d'Schoul.

Vun den 21.870 verongléckte Kanner an dëser Altersgrupp sinn 13 Prozent méindes bis freides tëscht 7 an 8 Auer bei engem Accident blesséiert oder ëm d’Liewe komm. Jeeweils néng Prozent haten tëscht 15 a 16 Auer, respektiv tëscht 16 a 17 Auer en Accident.

35 Prozent vun de Kanner, déi am Stroosseverkéier verongléckt sinn, waren am Auto ënnerwee. Weider 33 Prozent si Vëlo gefuer an 21 Prozent waren zu Fouss ënnerwee.

Bei de Kanner ënner sechs Joer ass mat 58 Prozent den héchsten Undeel am Auto a Begleedung vun Erwuessene verongléckt. Bei de bis 14 Joer alen hate mat 38 Prozent déi meescht en Accident, wéi se mam Vëlo ënnerwee waren.