Am Elysée zu Paräis war e Freideg eng Zort Krisereunioun. De franséische President Emmanuel Macron hat d'Parteicheffen an d'Kandidate fir d'Presidentiellen zesummegetrommelt. Dräi Stonne gouf diskutéiert. Duerno huet de Staatschef virun der Presse iwwer d'Menace géint Frankräich an Europa geschwat.
Virun allem déi hybrid Menacen aus Russland hätte sech déi lescht Wochen verstäerkt. Op säin Uerder soll d'Regierung elo e Plang ausschaffen, fir déi kritesch Infrastruktur vum Land ze protegéieren.
Iwwerdeems wären exklusiv d'Kricher an d'Fermeture vun der Strooss vun Hormus Schold un den héije Pëtrolspräisser, esou de Macron. Frankräich géing en G7-Sommet iwwer d'Energie organiséieren an d'EU-Kommissioun opfuerderen, méi a méi séier Pëtrol a Gas ze stockéieren.
D'Marine Le Pen vum Rassemblement National war selwer net present. Si hat sech vum Jordan Bardella vertriede gelooss. Ma wärend engem Deplacement huet si matdeele gelooss, dass de Macron als eenzeg Optioun hätt, d'Taxen op Sprit a Brennes ze reduzéieren.
