Mat iwwer 1.300 DronenUkrain attackéiert Krim-Bréck

AFP, iwwersat vun RTL
Kiew gesäit dës Géigenattacken als gerechtfäerdegt Äntwert op déi russesch Rakéiten- an Dronenattacke géint ukrainesch Stied an d'Energieinfrastruktur.
© AFP

D'Ukrain huet an der Nuecht op e Méindeg Honnerte vun Dronen a Richtung Russland geschéckt. Dobäi gouf och déi symbolesch wichteg Krim-Bréck getraff, déi déi vu Russland annektéiert Hallefinsel mam russesche Festland verbënnt. Dowéinst misst de Verkéier op der Bréck viraussiichtlech bis an den Nomëtteg ageschränkt ginn.

D'Attack op d'Bréck huet anscheinend just geréng Schied verursaacht. Bei de vu Russland agesate Vertrieder op der Krim huet se allerdéngs fir hefteg Reaktioune gesuergt.

Dem russesche Verdeedegungsministère no huet d'Ukrain am Ganzen 1.336 Dronen agesat.

D'Attack koum nëmme e puer Deeg virun engem geplangte Sommet an der chineesescher Stad Shenzhen tëscht dem russesche President Wladimir Putin, dem US-President Donald Trump an dem chineesesche President Xi Jinping. Den amerikanesche Vertrieder no soll de Krich an der Ukrain bei dëse Gespréicher keng zentral Roll spillen.

Ob et bei der Attack Doudeger oder Blesséierter gouf, gouf net matgedeelt.

D'Krim-Bréck ass zanter dem Ufank vun der russescher Invasioun am Februar 2022 ee vun de wichtegsten Ziler vun der Ukrain. Si gouf schonn e puermol attackéiert. Am Oktober 2022 war beispillsweis e mat Sprengstoff geluedene Camion op der Bréck explodéiert, wat de Verkéier iwwer Méint staark beanträchtegt hat.

Ronn 600 vun den ukraineschen Dronen, déi a Richtung Moskau ënnerwee waren, konnten dem Moskauer Buergermeeschter Sergej Sobjanin no ofgefaange ginn.

Dës Attacke koumen nëmme Stonnen, nodeems ukrainesch Truppen eng grouss russesch petrochemesch Anlag, eng Pëtrolsraffinerie an e militäresche Produktiounsstanduert attackéiert haten.

Back to Top
CIM LOGO