Gutt ee Mount no enger déidlecher Attack op US-Zaldoten a Syrien hunn d’USA an alliéiert Truppen e Samschdeg a Syrien op en Neits “grouss ugeluecht” Attacke géint d’Dschihadistemiliz Islamesche Staat (IS) geflunn. “Déi haiteg Attacke riichte sech géint den IS a ganz Syrien” a wieren Deel vum Asaz “Hawkeye Strike”, heescht et vum US-Regionalkommando Centcom op X. Am Dezember waren dräi US-Bierger an der Stad Palmyra, enger fréierer IS-Héichbuerg, ëmbruecht ginn.
Den Hawkeye-Asaz wier eng “direkt Reaktioun” op déi “déidlech IS-Attack” am Dezember, huet Centcom erkläert. Genee Informatiounen zu der Plaz vum Asaz goufe virop net gemellt. An engem Video, deen ënnert der Erklärung vu Centcom steet, si Loftopname vun e puer separaten Explosiounen ze gesinn, déi wuel a ländleche Géigende geschitt sinn. Als Reaktioun op d’Centcom-Erklärung schreift den US-Verdeedegungsminister Hegseth e Samschdeg bei X: “Mir wäerten ni vergiessen an ni noginn.”
Den 13. Dezember waren déi zwee US-Zaldoten an hiren Iwwersetzer, en Zivilist mat US-Nationalitéit, bei enger Attack vun engem presuméierten IS-Member an der Stad Palmyra ëmbruecht ginn. Doropshin huet d’amerikanesch Arméi am Dezember zesumme mam Alliéierte Jordanien Dosenden Ziler vun der Dschihadistemiliz a Syrien ugegraff. Der US-Regierung war den Ugräifer en Eenzeltäter mat Relatiounen zum IS. Den IS hat déi zentralsyresch Stad, déi an der Géigend vun enger anticker Unesco-Plaz mat griichesch-réimesche Ruine läit, Mëtt den 2010er Jore besat.
D’Attack op d’US-Zaldoten zu Palmyra war den éischte Virfall vun där Aart, zanterdeem de laangjärege syresche President Baschar al-Assad duerch d’islamistesch HTS-Miliz an hir Alliéierter am Dezember 2024 gestierzt gouf.
