Eng 31 Leit wäerte bei der franséischer Chaîne schaffen. D'Press konnt en Donneschdeg schonn e Bléck an de Buttek werfen.

De Chantier vum Royal Hamilius huet an de leschte Joren den Zentrum vun eiser Haaptstad gepräägt. Ma esou lues kommen d’Aarbechten op en Enn. E Freideg mécht den éischte Buttek am neie Shopping-Komplex fir de Public op. Schonn en Donneschdeg de Moie gouf déi nei Fnac schonn der Presse presentéiert.

D'FNAC mécht hir Dieren um Royal Hamilius op
Eng 31 Leit wäerte bei der franséischer Chaîne schaffen. D'Press konnt en Donneschdeg schonn e Bléck an de Buttek werfen.

Et ass déi éischte Kéier, dass déi franséisch Chaîne an de Grand-Duché kënnt. 31 Leit schaffe an der neier Fnac. D'Sortiment ass un déi lëtzebuergesch Clientèle ugepasst ginn, erkläert den Direkter vu Fnac Lëtzebuerg Richard Hoitinga.

"Lëtzebuerg ass multikulturell an dofir bidde mir och e Sortiment un, wou sech jiddereen erëmfënnt."

Ma et soll awer och an Zukunft gekuckt ginn, wéi eng Produite gutt lafen a wéi eng eventuell nach kënne bäikommen. Wee mam lëtzebuergesche Marché schonn méi Erfarung huet, sinn d’Librairen aus der Uewerstad. D’Fnac gëtt hei net als direkt Konkurrenz ugesinn, mengt d'Elmira Najafi, Gérante aus dem Alinéa.

Ech weess, wat d’Fnac ubitt a wou hire Fokus ass an dat ass definitive net d’Buch. An schonn guer net déi héichwäerteg Literatur. Mä mir wäerten dat da gesinn.

Nach éischter gëtt d’Enn vum grousse Chantier mat Ongedold erwaart, esou d'Carole Gourdin, Responsabel vun der Librairie Française.

D'FNAC mécht e Freideg hir Dieren op
Eng 31 Leit wäerte bei der franséischer Chaîne schaffen. D'Press konnt en Donneschdeg schonn e Bléck an de Buttek werfen.

D’Geschäftsleit, déi hir Butteker net wäit vun der Fnac hunn, fokusséiere sech virun allem op Produiten, déi vun der franséischer Chaîne net ugebuede ginn, sou de Franck Gigot vu Photo Mirgain.

Mir verkafen och gebrauchten analog Kameraen a mir hunn och vill Clienten, déi nach analog Filmer bei eis kafen. Wat fir eis och wichteg ass, ass, dass mir e Labo bei eis am Buttek hunn."

Spezialiséiert Geschäfter fënnt een an der Stad nach weiderhin. An mat der Erëffnung vun der Fnac an och vun anere grousse Chaînen am Royal Hamilius soll den Zentrum nees belieft ginn.

Déi Lénk hu fir e Freideg de Moien iwwerdeems e Protest-Piquet annoncéiert. Hei wier eng ëffentlech Plaz, matten an der Stad privatiséiert ginn, fir reng kommerziell Zwecker, kritiséieren déi Lénk.

D'FNAC mécht hir Dieren op, déi Lénk mécht Protestaktioun
Eng 31 Leit wäerte bei der franséischer Chaîne schaffen. D'Press konnt en Donneschdeg schonn e Bléck an de Buttek werfen.

© Domingos Oliveira (RTL)