Um Mëttwoch hunn déi sougenannt "Large-Scale-Tester" ugefaangen, wou breet duerch d'Populatioun an a méi exposéierte Gruppen nom Coronavirus gesicht gëtt.

Research Luxembourg / Reportage Carine Lemmer

Um Donneschdeg hunn d'Wëssenschaftler vu Research Luxembourg nach emol d'Wichtegkeet vun deenen Tester erkläert.

Et hëlleft, Leit ze fannen, déi infizéiert sinn, mä keng Symptomer hunn. Kontakter kënnen zréckverfollegt ginn an Infektiounsketten duerchbrach ginn. Esou ass e sécheren a méi e séieren Deconfinement, also d'Ophiewe vun den Aschränkungen, méiglech.

Méi een héijen Infektiounstaux zu Lëtzebuerg wéi an den USA

Den Ament ginn et offiziell nach 100 aktiv Infektiounen zu Lëtzebuerg, plus Donkelziffer. D'Zuele si gutt, mä de Virus ass nach ëmmer an der Populatioun. Eng infizéiert Persoun op der falscher Plaz kann d'Situatioun séier änneren.

A genee déi wëll ee bei de sougenannte "Large-Scale-Tester" fannen. E Mëttwoch hunn déi Tester ugefaangen, op 17 Drive-In-Statiounen (et muss een also net aus dem Auto klammen) an zwou Statiounen, wou een ze Fouss oder mam Vëlo hi kann. Et muss een ugeschriwwe gi fir sou en Test, deen am Hals gemaach gëtt, net an der Nues. E kascht näischt a jiddereen ass opgeruff, och matzemaachen.

D'Fuerscher hunn och ervirgestrach, datt mer hei am Land am internationale Verglach en héijen Infektiounstaux haten, pro Kapp méi Infektioune wéi d'USA zum Beispill.

Wichteg, fir de Virus am A ze halen

Et wär wichteg, datt mer dat am A halen. D'Infektioune kéinte séier nees unzéien. Am franséischen a belsche Grenzgebitt, wou och vill Frontalieren hierkommen, wär d'Prevalenz nach héich.

Wa mer zum Beispill den 1. Juni alles nees géifen opmaachen ouni Precautiounen, géif dat eng zweet Well bedeiten, de Lëtzebuerger Gesondheetssystem wär séier iwwerfuerdert an d'Zuel vun den Doudege géif ëm dat 8- bis 10-facht klammen. Dat soe Modeller vun de Wëssenschaftler.

2,6% vun der Populatioun hunn aktuell Antikierper, dat geet aus neien Date vun der CON-VINCE-Etüd ervir.

An där representativer Etüd ginn d'Leit jo och op de Virus getest. Zwou vun 1.751 Persoune goufen elo am Mee positiv getest. Dat bedeit, datt 0,08% de Virus haten, ouni Symptomer ze hunn. Op déi ganz Bevëlkerung héichgerechent (ouni d'Frontalieren) heescht dat, datt 402 Persounen infizéiert sinn, ouni et ze wëssen.

Corona-Viren am Lëtzebuerger Ofwaasser nogewisen

Fuerscher vum LIST hunn en Donneschdeg och erkläert, datt een d'Evolutioun vum Corona och am Ofwaasser vun de Kläranlage kann noweisen. De Virus gëtt nämlech iwwert den Daarm an deem Deel iwwert den Urin ausgescheet. Et konnten och eeler Waasserprouwen analyséiert ginn. Den 12. Februar konnt nach kee Virus nogewise ginn, déi éischt Spuere vum Virus gouf et de 25. Februar an der Kläranlag zu Schëffleng.