Zanter dem 2. August ass de Jean Asselborn mam Vëlo duerch Frankräich ënnerwee.

Op senger Facebook-Säit kann een all Etapp matverfollegen: d'Kilometer, déi den 71 Joer alen LSAP-Ausseminister all Dag hannert sech léisst, d'Kalorien, déi dobäi verbraucht goufen, d'Stied, déi e besichtege geet, esouguer och mol de Bols.

Hie géif seng Decisioun, säi klengen "Tour en France 2020" trotz der Pandemie unzegoen, assuméieren, schreift de Lëtzebuerger Chefdiplomat op Facebook. Hie wéilt Frankräich Merci soen, datt d'Grenze fir d'Lëtzebuerger opbliwwe sinn, an hie wéilt sech net vun enger permanenter Angscht wéinst dem Virus amauere loossen.

Et wier sécherlech net falsch, en Ausseminister ze kritiséieren, deen zu den aktuellen Zäiten am August d'Land verléisst. Iwwert déi digital Technologie wier hien awer zu all Ablack erreechbar.

Den Tour geet vun Neufchâteau iwwer Dijon an Aix-les-Bains op Mont Ventoux, dann op Arles a Béziers a schlussendlech op Capendu an d'Montagne Noire.

Ma net nëmmen den Ausseminister deelt seng Vakanzemomenter op de sozialen Netzwierker.

Déi gréng Deputéiert a Parteipresidentin Djuna Bernard schéckt Gréiss aus der Bretagne, hir Fraktiounscheffin Josée Lorsché sëtzt dogéint op Vakanz Doheem zu Duelem an d'Deputéiert Stéphanie Empain verbréngt sonneg Momenter zu Klierf.

D'Vakanz Doheem verbréngen, hire Facebooksäiten no, och d'LSAP-Deputéiert Cécile Hemmen, den DP-Deputéierte Claude Lamberty, de Piraten-Deputéierten Sven Clement an d'CSV-Deputéiert Nancy Kemp-Arendt, iwwerdeems hire Parteikolleeg a Käerjenger Deputé-Maire Michel Wolter duerch Lëtzebuerg wandert. Och den ADR-Deputéierte Fernand Kartheiser huet et net wäit fort gezunn, bis an d'Éislek, wou en dem Chamberpresident Fernand Etgen begéint ass.

D'CSV-Fraktiounscheffin Martine Hansen schéngt et méi wäit fort gezunn ze hunn, wou verréit se awer net, den Deputéierte Paul Galles ass an Italien ënnerwee, wou e mam Vëlo niewebäi Sue fir de gudden Zweck gesammelt huet an de Claude Wiseler hat et op Ostend an d'Belsch verschloen.

Hei d'Poste vun den zitéierte Politiker