D'parlamentaresch Kontrollkommissioun vum Srel war en Donneschdeg de Moie mat der Spëtzt vum Geheimdéngscht zesummen.

6 Deeg nodeems mer Iech vun engem méiglechen Dateleak beim Geheimdéngscht geschwat haten, war en Donneschdeg am spéide Moien d'parlamentaresch Kontrollkommissioun vum Srel eng éischte Kéier dowéinst mat der Spëtzt vum Geheimdéngscht zesummen. Eng éischte Kéier, well de Rendez-vous vun en Donneschdeg goung net duer, fir d'Diskussiounen ofzeschléissen.

Méiglechen Dateleak beim Srel / Reportage Eric Ewald

Et hätt een en Donneschdeg eng laang Diskussioun gehat, sot d'Kommissiounspresidentin an d'CSV-Fraktiounscheffin Martine Hansen no där Entrevue vun eppes iwwer enger Stonn, mä: „...mir hunn elo missen ofbriechen, a mir wäerten da muer, muer de Mëtten [Freideg] nach eng Kéier weiderfueren. Um 3 Auer hu mer dann déi nächst Sitzung“.

Méi konkret gouf d'Oppositiounspolitikerin awer net, a besonnesch net, wat d'Diskussiounen iwwert de Fait selwer vum Erstelle vun där Lëscht ugeet: „Dir wësst jo, dass ech aus dem Inhalt vun der Kommissioun näischt ka soen. Also, wéi gesot, ech kann iech just soen, dass mer muer nach eng Kéier eng Sitzung hunn, dass mer do weider diskutéieren a weider der Saach op de Fong ginn. Mir huelen dat natierlech ganz seriö, jiddereen hëlt dat ganz seriö, an dofir wäerte mer muer weiderfueren.“

Am Reportage goung et ëm eng 3 Säite laang Lëscht vun ca. 80 Mataarbechter vum Geheimdéngscht, déi e Staatsbeamten, dee bei de Srel wollt schaffe goen, erstelle konnt. Hien hat de Geheimdéngscht an d'Politik heiriwwer an d'Bild gesat, ma d'Reaktiounen dorop waren opgereegt-nervös, respektiv zimmlech inexistent. Op Grond vun deem Reportage war d'Entrevue vun en Donneschdeg iwwregens an d'Plaz komm vun där nächster geplangter Reunioun vun der Kommissioun, e Freideg 8 Deeg. D'Entrevue vun en Donneschdeg wär allzäit positiv gewiescht, sou d'Martine Hansen: „Mir haten e ganz konstruktiven Echange, jo.“

Vue dass een awer en Donneschdeg eben net fäerdeg gouf, ginn d'Diskussioune e Freideg de Mëtteg virun.