Dës Fro stellt sech, nodeems e Staatsbeamten, dee beim Srel wollt schaffen, sech eng Lëscht vun 3 Säite vun de Geheimdéngscht-Mataarbechter erstelle konnt.

De wichtegsten Deel vum Wuert Geheimdéngscht ass ouni Zweiwel de „geheim“. Wann et dofir engem geléngt, deen nach net emol Informatiker ass, fir eng Lëscht vun 3 Säiten opzestelle mat den Nimm vun zirka 80 Leit, déi beim a fir de Srel schaffen, dann ass dat problematesch.

Dateleak beim Srel? E Reportage vum Eric Ewald (1)

Méi wéi dat ass awer de Fait, dass, wann déi Persoun de Geheimdéngscht an d'Politik heirop opmierksam mécht, net vill bis keng Reaktioun kënnt. Vun enger neier Srel-Affär ze schwätzen, ass vläicht e bëssen héich gegraff, mä dësen Dateproblem interpelléiert awer.

E Staatsbeamte mat, wéi hien eis géintiwwer selwer sot, interessantem Job, deen awer méi Erausfuerderung sicht, a ganz konkret eng Aarbecht beim Srel, hat dofir am Abrëll eng Email un de Geheimdéngscht geschéckt. Stonnen drop krut hien eng Äntwert, dass een him de Moment leider näischt proposéiere kéint an en eventuelle Posten op GovJobs géif publizéiert ginn. No enger Zäitche goufen der dunn 3 ausgeschriwwen, wouropshin de Mann am beschten Alter seng Kandidatur eraginn huet. Fir seng Chancen z'optimiséieren, hätt hien „alles gekuckt, wat hie fräi zougänglech iwwert de Srel fanne géif“. Woubäi him d'Erstelle vun der Lëscht vu Mataarbechter gegléckt wär, ënnert deene schützenswäerter sinn an z.B. och en Externen. Hie géif déi Lëscht ni publizéieren, sot hien an engem 4-Aen-Gespréich, hätt se awer, souzesoen als Ass, fir e méiglechen Interview fir eng vun de Plaze gehalen. Hien hätt dunn doriwwer geschlof a sech geduecht, et wär awer de Geheimdéngscht an net e Fëscherclub, an dass hie vläicht misst Bescheed soen. Wouropshin hien der Srel-Chefin Doris Woltz an engem Responsabelen eng Email geschéckt huet. Dee Responsabelen huet doropshin ugeruff an de Mann gefrot, wéi hien doru kéim an ob hien him e puer Nimm nenne kéint. Wéi de Staatsbeamten der eng 20 bis 30 virgelies hat, hätt de Responsabele reagéiert „wéi wann hie beim Friemgoen erwëscht gi wär“. Hien hätt dem Kandidat opgereegt an nervös gesot, dee misst dës Lëscht zerstéieren. Deem seng Äntwert war, dass hie just hätt wëlle Bescheed soen. An engems huet dee gefrot, wéini hie Bescheed gesot krit, wat d'Posten ugeet. De Responsabele sot, dat géif bis e gewëssenen Datum geschéien, ma et hätt kee Mënsch sech méi bei him gemellt. Nom Delai sot de Responsabelen dunn, dass, soulaang hien do sëtze géif, de Kandidat net do schaffe géif. Deen hat iwwregens, virdrun eng Kéier beim Srel ugeruff an no deem Responsabele gefrot: Dobäi hat hien, um Telefon, deem säin Numm genannt kritt. Geheim ass anescht...

D'Geschicht hält awer net do op, mä huet och nach e politesche Volet... Och wann, wéi de Mann betount, keng politesch Geschicht doraus soll ginn, mä de Problem misst an d'Rei bruecht ginn.

Dateleak beim Srel? E Reportage vum Eric Ewald (2)

De Staatsbeamten huet dee Virfall zu engem gewëssenen Zäitpunkt dem Premier Xavier Bettel matgedeelt, mä deen hätt ni geäntwert, genee sou wéineg wéi d'Doris Woltz. Wouropshin de Mann mam Paul Konsbrück, Chef de cabinet vum Staatsminister, a mat 3 Deputéierte geschwat hätt, mat engem vun der Majoritéit a mat hirer zwee vun der Oppositioun. Nom Gespréich mam Paul Konsbrück hätt hien och e Refus fir deen 1. Posten, ma fir déi zwee aner ni eng Äntwert kritt. Et bleift ofzewaarden, wat déi nächst Reunioun vun der Geheimdéngscht-Kontrollkommissioun vun der Chamber, den 20. November, bréngt. De Kandidat mam ausgeprägte Wonsch a Wëllen, fir de Srel ze schaffen, géif dat eng „absolut Éier“ fannen. Hie seet, dass ni een him Problemer gemaach, hien awer och ni Merci gesot kritt hätt fir seng Informatioun: En attendant läit d'Lëscht mat den Nimm vun de Geheimdéngschtleit an engem Safe. De Mann seet sech awer „degoûtéiert vun der Aart a Weis, wéi dat heiten ofgelaf ass“!

Sëtzung vu parlamentarescher Kontrollkommissioun virgezunn

Kontrollkommissioun kënnt zesummen / Rep. vum Eric Ewald

Op Grond vun eisem Reportage vun e Freideg de Moien iwwer e méiglecht Dateleak beim Geheimdéngscht ass en Donneschdeg schonn eng Sëtzung vun der parlamentarescher Kontrollkommissioun vum Srel. U sech hätt eréischt an zwou Wochen eng nächst solle sinn. Der Kommissiounspresidentin an CSV-Fraktiounschefin Martine Hansen no géif een d'Saach seriö huelen. Well awer alles geheim wär, wat an der Kontrollkommissioun gesot gëtt, géif si keen Interview dozou ginn, hat et nach vum Martine Hansen geheescht.

Mir wäerten an där kuerzfristeg aberuffener Kommissiounssëtzung doriwwer schwätzen, huet den DP-Fraktiounspresident Gilles Baum erkläert, virdru wär näischt heizou ze soen.

Och de Georges Engel, LSAP-Fraktiounschef, huet op d'Kommissiounssëtzung vun en Donneschde verwisen. Hie wéilt déi ofwaarden. Vue dass d'Affäre vum SREL der Geheimhaltung ënnerléichen, wéilt an dierft hien och näischt doriwwer erzielen.

A well an der Tëschenzäit eng Kommissiounssëtzung aberuff gi wär, géif och si näischt zu deem Reportage soen, sot d'Josée Lorsché, Fraktiounspresidentin vun déi Gréng. Et wär ze fréi, fir eng Ausso zum eventuellen Dateleak ze maachen, an och si wéilt d'Kommissiounssëtzung doriwwer ofwaarden.