Wéinst der Hausse vun Neiinfektioune mam Coronavirus huet d'Regierung decidéiert, e Risiko an der Impfstrategie anzegoen.

Impfcampagne zu Lëtzebuerg / Reportage Pierre Jans

D'Impfcampagne zu Lëtzebuerg soll acceleréiert ginn. An den nächsten zwee Méint hält ee just nach d'Hallschent vun der Reserv vun den Impfdosisse vun AstraZeneca, sou wéi dat och schonn aner europäesch Länner maachen.

Impfcampagne gëtt acceleréiert, manner Dosissen a Reserve
Wéinst der Hausse vun Neiinfektioune mam Coronavirus huet d'Regierung decidéiert, e Risiko an der Impfstrategie anzegoen.

D'Reserv soll ëm d'Hallschent gekierzt ginn, an der Hoffnung, beim Impfe méi séier weiderzekommen. Iwwert dee Wee wëll ee méi Leit eng éischte Kéier vaccinéieren. Dat huet d'Gesondheetsministesch Paulette Lenert en Donneschdeg de Moien op enger Pressekonferenz gesot.

Paulette Lenert iwwer AstraZeneca

Den AstraZeneca erlaabt méi e laangen Delai tëscht der éischter an der zweeter Impfung. Mat dëser Diskussioun geet d'Regierung e gewëssene Risiko an, confirméiert d'Paulette Lenert. Fir d'Leit géif am Prinzip näischt änneren. Jidderee soll en zweete Rendez-vous bannent 10 Woche kréien. Allerdéngs kéint een dat duerch dëse Schratt net méi garantéieren, well ee bei de Liwwerunge jo ofhängeg vum Produzent ass. D'Zweiwel un der Effikassitéit vum Impfstoff vun AstraZeneca wären iwwerdeems net berechtegt, huet den Direkter vun der Santé Jean-Claude Schmit erkläert. Nei Etüden hätte bewisen, dass AstraZeneca ee gudden Impfstoff ass.

Donieft wëll d'Santé Schnelltester kafen. Et wär een amgaangen, verschidde Produiten ze préiwen. Dat no zwee Haaptkrittären: Et misst einfach sinn, d'Prouf ze huelen, an den Test misst effikass sinn. Dem Santésdirekter Jean-Claude Schmit no handelt et sech dobäi ënnert anerem ëm ee Schnelltest, bei deem den Ofstréch vir an der Nues gemaach gëtt.

Dr Jean-Claude Schmit iwwer Schnelltester

D'Infektiounen zu Lëtzebuerg ginn nees erop. D'Situatioun wär kriddeleg, esou d'Gesondheetsministesch. Déi brittesch Variant mécht antëscht ronn d'Hallschent vun de Fäll aus. D'LSAP-Ministesch huet betount, wéi wichteg et ass, elo wou déi méi ustiechend Virus-Variante present sinn, datt een d'Gestes barrières weider eescht huele muss. Besonnesch am Private sollt ee seng Kontakter reduzéieren. D'Quarantän misst strikt agehale ginn. Den Test um Enn dovunner ass obligatoresch, esou den Appell vun der Paulette Lenert.

Liest all déi wichteg Changementer, Ofsoen an Aussoen no an eisem Liveticker.