Zanter e Freideg ass de Jos Bourg den neie Besëtzer vum Schlass zu Biertreng.

Den Entrepreneur Jos Bourg ass den neie Besëtzer vum Biertrenger Schlass. De gebiertegen Ettelbrécker huet déi héchsten Offer gemaach, fir d’Schlass an d’Lännereien ronderëm ze kafen an domadder seng puer wéineg Konkurrenten, dorënner déi 5 Nordstadgemengen, iwwerbueden.

D'Schlass wäert an Zukunft zu private Wunnzwecker genotzt ginn, seet de pensionéierten Entrepreneur, deen direkt mat de Renovéierungsaarbechte wäert lassleeën.

De Jos Bourg: "E Cadeau, en Zoufall, e Luxus, ... Ech si frou, dass ech et hunn, mir wäerten et renovéieren an da gëtt dra gewunnt."

Kléngt formidabel. Ech kafen net nëmmen e Schlass, ech hu Bësch kaaft. Fir wéi vill Geld, bleift e Secret. Beim Jos Bourg spiert een eng gewësse Passioun. D'Schlass wier d'Schlagsan um Kuch. De Bësch a seng Juegd ass en anere Stéck Chantier, deen de Schlasshär intresséiert.

De Jos Bourg: "Jo do kënnt eng Aarbecht op mech duer, mat der Juegd sinn ech och vu Bouf u verbonnen. Meng Joren als Federatiounspresident kennt der an ech hunn och virun e puer Méint elo do d'Juegd gepacht, dee ganze Beréng do. och dat wat anere Leit, och den Ierwe gehéiert. Den 1. Abrëll geet dee Pachtvertrag un. Dat heescht et ass eng Kombinatioun Juegd/Bësch an eben och e fantasteschen Objet als Gebailechkeeten."

Bësch, Juegd a Schlass géifen an d'Rei gesat. D'Schlass uerdentlech sanéieren ze loossen, dierft dem Entrepreneur, e Profi am Bau, kaum schwéier falen, an hei géing et och net ëm finanziell Ënnerstëtzung vum Staat, mee ëm den Objet. Kloer, et misst een dra stiechen, kloer och, dass ee sech am Virfeld schlau gemaach a mat Sites et Monuments geschwat hätt.

De Jos Bourg: "Mir hunn eis am Virfeld gutt ofgeséchert, déi Firma, déi hei zu Lëtzebuerg de Palais an d'Chamber renovéiert huet, déi mécht de Gros, dat ronderëm, an dat bannendran do ginn ech duerch meng Professioun schonn eens, mat menger Firma."

D'Nordstadgemenge goufen iwwerbueden. Vill Virwëtzeger, mee wéineg richteg Intresséierter hätten un der Stee deelgeholl. Mam Resultat nennen och déi staatlech Denkmalschützer sech zefridden. Sites et Monuments fënnt de Projet vum neie Schlasshär compatibel mam Patrimoine.

De Jos Bourg: "Mech huet gewonnert, dass d'Nordstadgemenge sech dofir intresséiert hunn, ech weess net ob se wosste wat domat maachen, de Schierener Buergermeeschter sëtzt warscheinlech léiwer am Schlass wéi a senger Gemeng. Mee et ass menger Meenung no guer keen Objet fir d'Nordstadgemeng. Fir administrativ Zwecker géing et sech guer net eegnen."

Am Resumé: weder Russen nach Chineesen, mee e Lëtzebuerger krut d'Biertrenger Schlass. Dat däerf weder ofgerappt nach ëmgebaut ginn, nach kënnt eng nei Cité donieft. En Hotel géif et och net, mee de Sëtz vun der Famill. Rëss géifen direkt gefleckt a séier renovéiert. An och wat déi historesch Bréck ugeet, wier een oppe fir all Diskussioun.

RTL