E Samschdeg koum et um Chrëschtmaart zu Bartreng zu enger Verhaftung, déi an de soziale Medie fir vill Diskussioune suergt.

Eng muskléiert Arrestatioun vun der Police, déi e Samschdeg gefilmt gouf, suergt aktuell op de soziale Reseaue fir vill Reaktiounen a Commentairen.

Wéi mer vun der Police confirméiert kruten, gouf effektiv e Samschdeg um Bord vum Wantermaart zu Bartreng eng alkoholiséiert Persoun mat an de Passagearrest geholl. An engem Bulletin, deen d'Police e Méindeg am Nomëtteg verschéckt huet, stoungen da weider Detailer. Deemno wier ee vun der Bartrenger Gemeng geruff ginn, well zwou alkoholiséiert Persoune sech geweigert haten, de Maart ze verloossen. Wéi d'Beamten op d'Plaz koumen, wier eng vun de Persoune ganz onkooperativ gewiescht. De Mann hätt d'Beamte provozéiert a beleidegt. Well d'Situatioun weider eskaléiert wier, hätten d'Beamten decidéiert, de Mann an den Arrest ze placéieren.

Wat de Video vun der Verhaftung, deen den Ament an de soziale Medien d'Ronn mécht betrëfft, heescht et vun der Police, dass de Parquet an d'Inspection générale de la police (IGP) iwwert dësen informéiert wieren.

Um Video ass ze gesinn, wéi e Beamten de Mann, dee sollt Handschellen ugedoe kréien, zwee Mol mam Kapp widder d'Fënster vun der Police-Camionnette schléit. Um Enn gouf de Mann du mat an d'Ausniichterungszell geholl.

D'Tageblatt schreift, datt et sech bei deem Personnage ëm keen onbeschriwwent Blat handelt an identifizéiert de Mann als de Ben Schronen - e Personnage, deen och bei Anti-Corona-Restriktiounsmaniffen dobäi war. Ënnert anerem wier de Ben Schronen och mat vun der Partie gewiescht, wéi de Wantermaart op der Plëss quasi gestiermt gi war an d'Demonstrante bei d'privat Wunnenge vun de Ministere Bettel a Cahen gaange waren, fir do hir Parollen ze verbreeden.

D'Kolleege vun RTL5Minutes hu probéiert un dëse Mann ze kommen, mä ouni Succès.