Zanter 7 Joer feelt vum klenge Bianka Bisdorff all Spuer. De Puppelche war knapp ee Mount no senger Gebuert verschwonnen.

Zanter dem Juli 2015 ass de Bëbee deemno als vermësst gemellt. Vun en Dënschdeg de Moien u sollt sech d'Mamm viru Geriicht ënner anerem wéinst Mord, Doudschlag a Kierperverletzung un engem Mineur veräntwerten. E Prozess, wou ee sech Äntwerten erhofft bei villen Onkloerheeten, déi et déi lescht Joren an dëser Affär gouf. De Prozess ëm dat zanter 2015 als vermësst gemellt Kand Bianka Bisdorff goung en Dënschdeg awer net wéi geplangt un. De Prozess geet e Mëttwoch mat den Aussoe vun den Enquêteuren un.

Prozess-Optakt/Reportage Diana Hoffmann

Et ass zum Retard komm, well eng aner Affär op der Chambre criminelle nach fir d'éischt op en Enn bruecht ginn ass.

Déi Ugeklote selwer, a Mamm vum Kand, war den Dënschdeg de Moien net um Geriicht an der Stad opgedaucht. Si huet wéi et schéngt bis haut keen Affekot engagéiert an och kee Kontakt zu deem opgeholl, deen hir zur Säit gestallt gëtt.

E Mëttwoch de Mëtte geet de Prozess da mat den Aussoe vun zwee Enquêteure vun der Police un. En Donneschdeg sinn dann zwee Experten drun, fir hir psychologesch Expertis ze presentéieren. Déi Deeg drop ginn dann nach ënner anerem Zeien, de Pediater vum Kand, eng Assistante sociale, wéi och d'Mamm an d'Tatta vun der Beschëllegter gehéiert. Der Ugeklote gëtt ënner anerem Mord, Doudschlag a Kierperverletzung reprochéiert. Fir de Prozess si fënnef Deeg ugesat.

Wou ass dat klengt Bianka Bisdorff?

Virop steet d'Fro: Lieft de Puppelchen nach oder net? D'Uklopunkte vum Parquet loossen drop schléissen, dass ee vum Doud vum Kand ausgeet. D'Enquêtë waren Enn 2019 ofgeschloss ginn. D'Biller vun dëser waren deemools a sämtleche Medien ofgedréckt. Ze gesinn, war wéi e Weier zu Lénger fir d'éischt duerchsicht, dunn eidel gepompelt ginn ass. Gesicht gouf no der Läich vum Kand - ouni Succès. Den Hannergrond war, dass en Zeien d'Mamm mam Kand gesinn hat dohinner goen, ouni zeréckzekommen.

Séier war esou d'Mamm an d'Viséier vun den Enquêteure geroden. Och well si net sot, wou hiert Kand dru wier. Just e puer Deeg, nodeems de Bëbee verschwonne war, war d'Fra verhaft ginn. Vill war fir d'Press iwwer déi genee Ëmstänn net gewuer ze ginn, mam Verweis op de Jugendschutz. No 14 Méint koum si nees, ënner Oplagen, aus der Untersuchungshaft fräi.

Dass de Puppelche verschwonne war, ass iwwerhaapt eréischt opgefall, well d'Sektioun Jugendschutz vun der Escher Police bei der Mamm passéiert war. D'Beamte ware vun engem Jugendriichter beoptraagt, d'Kand zu sengem Schutz an hir Ophutt ze huelen. Esou wéi dat och scho fir d'Gesëschter vum Bianka de Fall war.

Eng méiglech Spuer huet och a Portugal bei dat familiäert Ëmfeld gefouert. An domat Hoffnung gemaach, dass d'Kand nach liewe kéint an un eng Drëttpersoun weider gereecht gi wier. Dat, fir esou dem Ofhuele vum Suergerecht ze entgoen.

Et gouf an all Richtungen enquêtéiert. Bis haut ass awer onkloer, wat geschitt ass an ob d'Kand, wat antëscht 7 Joer al wier, nach lieft oder net.