Et war um Donneschdegowend géint 23 Auer, wou der Nuetsschicht um Mäerter Hafen eng Dampentwécklung an engem Schrottkoup opgefall ass. Géint Hallefnuecht hunn d'Läschaarbechten ugefaangen.
"Eis Leit bloufe sur Place an hu gehollef d'Feier ënner Kontroll ze kréien. Et gouf och Waasser mat enger Schëpp iwwer de Koup geschott fir d'Feier séier auszekréien", esou den Direkter vu Luxport, Gilles Braquet um RTL Mikro. Op déi Manéier konnt d'Feier sech net ausbreeden. Den Direkter schwätzt vun enger Surface vun 20 Meter Carré, déi gebrannt huet.
Géint Hallefnuecht sinn och d'Gemengeresponsabel vu Mäertert/Waasserbëlleg iwwer de Virfall vum 112 informéiert. Well den Damp vun Ufank un zimmlech staark Richtung Mäertert gezunn ass, huet den COS, de Commandant des Opérations de Secours gefrot fir en LU-Alert auszeléisen.
"Géint 3 Auer an der Nuecht kann ee soen, dass d'Feier praktesch aus war", esou de Jos Schummer, Éischte Schäffe vun der Gemeng Mäertert/Waasserbëlleg. "Entretemps haten dunn och d'Leit vum Hafe mat hire risege Kranen do gehollef. Do war ee Kran mat enger Schëpp wou e puer Kubikmeter Waasser raginn, dee séier a gutt hëllefe konnt", esou nach de Jos Schummer.
Vum CGDIS waren d'Ekippe vu Mäertert/Gréiwemaacher, Manternach, der Stad a Fluessweiler op der Plaz, grad esou wéi eng Spezialunitéit vum CGDIS, déi zoustänneg ass, fir geféierlech Substanzen. Och Hesper Pompjeeë ware beim Hafen aktiv. "Si hunn en TMF, en Teleskop Mast Fahrzeug. Stabil Gefierer goufen nämlech gebraucht. Fir aus héijer Héicht a wäit vum Feier ewech Waasser drop geheien". Tëscht 70 bis 80 Pompjeeë waren am Asaz.
An de fréie Moiesstonnen huet de Mäerter Buergermeeschter Jérôme Laurent op Nofro matgedeelt, dass d'Feier an Tëschenzäit geläscht wier.
Dräi Persoune goufen dann en Donneschdeg den Owend op eise Stroosse blesséiert: Zu Leideleng huet et géint 18 Auer gerabbelt. Zwee Autoe waren aneneegerannt, zwou Persoune goufe verwonnt. De SAMU aus der Stad war op der Plaz, grad ewéi Ambulanze vu Mamer an aus der Stad, d'Pompjeeë vu Leideleng a Monnerech.
Zur selwechter Zäit krute sech zu Beetebuerg een Auto an ee Camion ze paken, hei gouf et ee Blesséierten, ëm dee sech d'Secouriste vu Beetebuerg gekëmmert hunn.
