Um Freideg géint 1 Auer gouf der Police e Gefier gemellt, dat Schlaangelinne vum Wandhaff a Richtung Hoen gefuer ass. E bësse méi spéit konnt den Auto gestoppt ginn. Den Alkoholtest vun der Automobilistin war positiv, de Permis gouf agezunn.
Zäitgläich gouf et op der Route d’Arlon bei engem Chantier e Verkéiersaccident. D’Fra hannert dem Stéier gouf net blesséiert. D’Streck gouf fir d’Opraumaarbechte gespaart.
Géint 1.50 Auer ass d’Police op e weideren Auto opmierksam ginn, deen op der nämmlechter Plaz iwwert d’Ofspärung gefuer ass. D’Automobilistin stoung ënnert dem Afloss vun Alkohol a krut e provisorescht Fuerverbuet.
E bësse méi spéit ass en zweeten Auto mat héijer Vitess iwwert déi besote Streck gefuer. Den Alkoholtest war nees positiv an et gouf e Protokoll geschriwwen.
Zu Dikrech war géint 3.30 Auer en Alkoholtest positiv an och hei gouf e Protokoll geschriwwen. D’Persoun ass kontrolléiert ginn, well se ze séier mam Auto ënnerwee war.
