Am Automag vun haut gëtt et sportlech: den Akim Schmit aus eiser Automag Ekipp war fir eis mam Golf 8 GTI ënnerwee. Top oder Flop? Mir ginn et elo gewuer.

02/12/2024 AUTOMAG VW Golf 8 GTI Facelift

1974 koum den éischte VW Golf op de Maart, 2024 feiert de kompakte Modell aus Wolfsburg deemno säi ronne Gebuetsdag. Zwar gëtt et als Kaddo keng nei Generatioun, awer dofir e Facelift, deen déi eng oder aner Kannerkrankheet vum Golf 8 aus der Welt schafe soll.

Missioun

Mam GTI steet ee vun den emotionaalste Golf Modeller virun eis. Déi dräi Buschtawen hu Generatioune vu jonken Automobilisten dreeme gedo. Ma och e Golf 8 GTI riicht sech un eng Klientele déi mat zwee Been am Liewe steet an op den Allrad vun engem Golf R oder déi zousätzlech Leeschtung vun engem GTI Clubsport (300 PS) verzichte kann.

Design

Facelift oblige huet VW den Desgin iwwerschafft an dovu profitéiert fir nei Optiounen anzeféieren. Wie wëll, kritt säin Daach schwaarz lackéierten oder de VW Emblem beliicht. D‘Matrix-LED Luuchte si Serie a méi schmuel geschnidden. Dobäi kommen nei Felgen, nei Réckluuchten an 3D Optik an eng duebel Ofgasanlag.

Banneraum

Wat direkt an d’Ae spréngt, ass de fräistoenden Infotainment Bildschirm. Dat wierkt méi modern, genee esou wéi d’Software, déi méi flësseg leeft a sech mat Shortcuts un déi individuell Virléiften upasse léisst. Highlight si fir mech awer déi klassesch Knäppercher um Steierrad déi zeréck sinn. Rout Akzenter, GTI Logoen an d’Sëtzer mam Karomuster sinn natierlech weiderhinn u Bord an deiten drop hi, wat ënnert dem Capot stécht.

Undriff

Häerzstéck ass en 2-Liter Véierzylinder Bensinner mat 265 Päerd, dat sinn der 20 méi wéi bis elo. 370 Nm Dréimoment ginn op déi viischt Rieder lass gelooss, de Sprint op Tempo 100 dauert knackeg 5,9 Sekonnen. Méi Leeschtung an engem Verbrenner-Golf gëtt et nëmmen am Clubsport (300 PS) oder R (333 PS). Geschalt gëtt just nach automatesch, fir manuell Agrëff gëtt et Schaltwippen. Als Verbrauch gëtt VW 7,3 Liter op 100 Kilometer un, wien de GTI awer erliewe wëll, verbrennt méi. Mäi Verbrauch louch tëscht 8,5 an 9 Liter op 100 Kilometer.

Op der Strooss

Am Alldag huet mech de GTI mat sengem Confort iwwerrascht, et sief, et wiesselt een an de Sportmodus. Net just dass de Sound da méi präsent ass, nee, och d’Fuerwierk gëtt an d’Lenkung gi méi straff. Eenzeg d’Bremse kéinten a sportleche Momenter méi Bëss hunn, am Alldag si se awer genee richteg a gutt doséierbar.

Fazit & Präis

VW huet beim Facelift vum Golf 8 GTI un de richtege Schrauwe gedréit. Leider awer och un der Präisschrauw: lass geet et bei 43.300 Euro, domat dierft och de Golf 8 GTI fir vill Jonker a jonk Bliwwener en Draam bleiwen.