Den thematesche Wanderwee féiert duerch eng ofwiesslungsräich Landschaft mat Wiss, Hecken a Bësch. Laanscht de Wee sti verschidden Informatiounspanneauen, déi erklären, wéi Insekte liewen, firwat si esou wichteg sinn a wéi jiddwereen och doheem e Bäitrag zu hirem Schutz leeschte kann. Aus enger einfacher Wanderung gëtt esou eng Entdeckungsrees an d'Welt vun deene klengste Liewewiesen.
Vill Leit denken als éischt u Beien oder Päiperleken. Mee d'Insektewelt ass vill méi grouss. Käferen, Libellen, Wëllbeien, Heesprénger oder Seechomessen - all Aart huet hir eege Roll am natierleche Gläichgewiicht. Um Insektepad léieren d'Visiteuren dës Déieren aus enger neier Perspektiv kennen an entdecken, wéi vill Liewen sech direkt virun eise Féiss ofspillt.
De Wee riicht sech un déi ganz Famill. Kanner kënnen observéieren, sichen an entdecken, wärend Erwuessener méi iwwer d'Zesummespill tëscht Natur, Biodiversitéit an Mënsch gewuer ginn.
Den Insektepad zu Waldbëlleg weist, datt et sech lount, och emol méi genee hinzekucken. Déi kleng Déieren, déi mir am Alldag dacks kaum bemierken, si fundamentaalt Bestanddeel vun eiser Natur. Wien de Wee geet, kënnt net nëmme mat e puer Kilometer an de Been zeréck, mee och mat engem anere Bléck op eng faszinéierend Welt, déi meeschtens direkt virun eiser Nues läit.
