De Wee ass 9,7 Kilometer laang an d'Belounung fir d'Hiwwele kënnt ëmmer nees a Form vu Bësch, Fielsformatiounen an dem Ausbléck op d'Sauerdall. Et ass eng Landschaft, déi permanent wiesselt: mol leeft een ënnert de Beem, mol geet de Bléck wäit iwwert d'Dall, an da steet een nees viru moosege Fielsen. A grad dës Ofwiesslung mécht de Rouspert-Wee interessant: en ass net nëmmen eng Streck, déi een oftrëppelt, mee eng kleng Rees duerch ganz verschidde Landschaften.
An iergendwann kënnt een op eng Plaz, déi sech bal wéi eng kleng Insel an der Landschaft ufillt: d'Girsterklaus. Visit Luxembourg beschreift dës Plaz als ee vun den Highlights vum Wee – an et lount sech tatsächlech, hei eng Paus ze maachen an d'Atmosphär op sech wierken ze loossen.
No der Rou ronderëm d'Kapell geet et nees weider. De Wee féiert zeréck a Richtung Rouspert – an domat och nees duerch déi méi wëll Natur vum Sauerdall. De Rouspert-Wee ass eppes fir déi, déi beim Wandere gär e bëssen Zäit matbréngen. Fir déi bal zéng Kilometer soll een ongeféier dräi Stonne rechnen, an de Wee ass als mëttelschwiereg klasséiert. Op Allefall bréngt en Natur a Geschicht zesummen. A vläicht ass et genee déi Mëschung, déi aus enger Wanderung e klengen Ausfluch mécht, un deen een sech nach e bësse méi laang erënnert.
