En Donneschdeg de Moie war den Deputéierte vun de Piraten eisen Invité vun der Redaktioun.

Mir hu guer kee Problem mat "Memes" déi eis politesch Sujete behandelen, wann et awer privat gëtt, a souguer d’Famill mat eragezunn gëtt, dann hält de Spaass op.

Dat sot de Marc Goergen, den Deputéierten vun der Piratepartei um Donneschdeg de Moien als eisen Invité vun der Redaktioun.

Hien hat sech kierzlech derfir agesat, dass verschidde Memes, déi d’Piraten an hir Famille satiresch viséiert hunn, vum Internet erofgeholl ginn. Hien hat eng Plainte deposéiert.

Dat géing net géint d’Iwwerzeegunge vun der Piratepartei goen, et wier ee weiderhin fir e fräit Internet, mä och do wier et kee rechtsfräie Raum.

Satir iwwert politesch Themen, domadder kéint hie liewen, sot de Marc Goergen, mä wann eben Famillen mat eragezu ginn, dat geet net.

D’Piratepartei misst een iwwerdeems gesinn als eng Zort Start-Up. Iwwer 6% bei de leschte Chamberwale wiere sécherlech iwwerraschend komm, mä et géif een eng seriö parlamentaresch a Partei-Aarbecht maachen, an d’Regierung op enger helle Wull vu Punkte kritesch hannerfroen.

Invité vun der Redaktioun: Marc Goergen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.