En Dënschdeg de Moie war de Chef vun ArcelorMittal zu Lëtzebuerg eisen Invité vun der Redaktioun.

E Sozialplang kann den Ament net ecartéiert ginn. D'Zuel vu 570 Leit géif do stoen an elo misst gekuckt ginn, wéi dës Aarbechtsplazen ofgebaut ginn. Dat sot de Roland Bastian, Generaldirekter vun ArcelorMittal Lëtzebuerg. Hie war den Dënschdeg de Moien eisen Invité vun der Redaktioun. An den nächste Woche géing elo am Kader vun der Tripartite gekuckt ginn, wéi eng Solutiounen ee kéint fannen, fir dat ofzefiederen. Lëtzebuerg huet e Modell, dee schonn iwwer Joerzéngte fonctionéiert mat Instrumenter wéi Preretraiten oder eng Cellule de Reclassement. D'Situatioun wier awer seriö, sou den Invité.

Ausléiser vum Aarbechtsplazen-Ofbau

D'Corona-Pandemie wier just d'Drëps, déi d'Faass zum Iwwerlafe bruecht hätt. Scho virdrunner hätten déi lëtzebuergesch an déi europäesch Stolindustrie mat enger ganzer Rei schwéiere Problemer ze kämpfe gehat. Engersäits déi weltwäit massiv Iwwercapacitéit um Stolmarché, d'Offer wär méi grouss wéi d'Demande. Do kéint kee Stolproduzent sech mat profitabele Margen duerchsetzen.

E klore Reproche un d'Europäesch Unioun

Anerersäits geet e klore Reproche vum Generaldirekter vun ArcelorMittal Richtung Bréissel. D'Import-Taxen op europäeschem Stol, vu 25 Prozent pro Tonn, déi den Donald Trump virun 2 Joer agefouert huet, maachen et den europäesche Produzente schwéier, fir Gewënn ze maachen an d'Géigemesurë vu Bréissel wäre bei wäitem net sou effikass. Dobäi kéimen dann nach déi héich CO2-Taxen, déi d'Industrie an Europa ze bezuelen hätt. Et wär jo gutt, dass ee géing Efforte maachen, fir d'Ëmwelt ze schützen an dozou wéilt een och bäidroen, mee et wär een einfach net konkurrenzfäeg, wann dat am Rescht vun der Welt net geschitt, kritiséiert de Roland Bastian.

Zukunft vun der Stolindustrie

De Grupp ArcelorMittal misst sech natierlech och duerch dës Kris a Fro stellen. De Konstruktiounsmarché an d'Automobilbranche ware scho virun der Pandemie réckleefeg. Wann den Exercice vun der Tripartite an den nächste Wochen a Méint awer gutt géing lafen an een och géing gutt Moyene fannen, fir weiderhin zu Lëtzebuerg z'investéieren, dann hätt d'Lëtzebuerger Stolindustrie eng gutt Zukunft, fënnt de Roland Bastian. Arcelor Mittal géif weiderhin zum Standuert Lëtzebuerg stoen.

D'industriell Sitten hei am Land wieren net a Gefor. Sou nach de Generaldirekter.

Invité vun der Redaktioun: Roland Bastian

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.