En Dënschdeg de Moie war de gréngen Deputéierten eisen Invité vun der Redaktioun.

De gréngen Deputéierten a Budgetsrapporter François Benoy seet awer och, et misst een déi nächst Jore "puer Schëppe" bäileeën.

De Staatsbudget fir d'nächst Joer ass "dee gréngste Budget, dee mer jee haten". Sou huet de gréngen Deputéierten a Budgetsrapporter François Benoy den Dënschdeg de Moien hei op RTL op d'Remarke vum Rechnungshaff reagéiert. Dee mengt nämlech, datt ee vum aktuelle Wuesstemsmodell op ee méi equitabelen a nohaltege Modell soll ëmklammen. De François Benoy sot d'Investissementer an d'Nohaltegkeet an de Klimaschutz ginn op e Rekordniveau erop an et ginn nei Ureizer geschaaft, fir Wunnengen ze renovéieren. Donieft huet de François Benoy d'CO2-Steier genannt. Trotz där Steier erreecht Lëtzebuerg seng Klimaziler net, mee déi Steier géing weisen, datt een a Richtung Klimaneutralitéit muss goen.

De grénge Budgetsrapporter huet awer zouginn, datt een déi nächst Joren "nach e puer Schëppe" misst bäileeën. A sengem Rapport mécht de François Benoy eng 50 Recommandatiounen, ënnert anerem fir dem Personalmanktem an der Santé entgéintzewierken, fir den Zougank zum Logement ze verbesseren a fir de Klimaschutz ze stäerken. An deem Zesummenhang seet hien, datt um Equiliber tëscht der Besteierung vun der Aarbecht an der Besteierung vum Kapital muss geschafft ginn. De François Benoy fënnt et zum Beispill net gerecht, datt een 13. Mount méi besteiert gëtt ewéi Dividenden oder Immobilien.

Dat si Recommandatiounen, déi net am Staatsbudget fir d'nächst Joer ëmgesat ginn. Dozou sot de gréngen Deputéierten: "Wann 3 Parteien ee Budget zesumme maachen, da muss ee sech do ëmmer fannen".

Invité vun der Redaktioun: François Benoy

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.