Et geet drëms, d'Terrassen ënnert ganz strenge Mesuren kënnen opzemaachen. D'Zuele géifen et erlaben. Dat sot de Mëttelstandsminister Lex Delles.

D'Chamber stëmmt en Donneschdeg de Mëtteg iwwert dat neit Covid-Gesetz of, ma moies huet de Mëttelstandsminister Lex Delles scho bei eis op der Antenn erkläert, datt d'Zuelen et den Ament erlaben, fir d'Terrassen ënner ganz strenge Konditiounen opzemaachen. E Mëttwoch gouf et jo 387 Neiinfektiounen op engem Dag, ma d'Hausse wier net exponentiell, huet de liberale Minister betount. De Reproduktiounstaux wier liicht iwwer 1, an de Risiko sech dobaussen ënnert de virgeschriwwene Konditiounen unzestiechen, wier den Experten no kleng.

En Terrassentourismus vu Leit aus eisen Nopeschlänner, déi duerch d'Bänk méi streng sinn oder an den nächsten Deeg ginn, fäert de Lex Delles net. Lëtzebuerg wier zwar keng Insel, ma et misst een d'Situatioun bei eis kucken, d'Neiinfektiounen an d'Hospitalisatiounen, fir Decisiounen ze huelen. Senger Meenung no, géif et hei net drëm goen, Tourismus ze maachen tëscht moies 6 an owes 6, ma fir de Leit e bëssche Loft ze ginn.

D'Konditioune wiere ganz streng an d'Restauranten an d'Caféeë missten och net opmaachen. Déi staatlech Hëllefe géifen egal wéi weider lafen. De Chômage partiel gëtt nach de ganze Mount Mee zu 100% ausbezuelt. Déi aner Hëllefe lafen nach bis Juni. Dobäi kënnt, datt nach laang net jiddereen eng Terrass huet oder d'Moyenen, genuch Leit op senger Terrass z'empfänken. Wéi vill Etablissementer bei dëser éischter Ouverture zanter November matmaachen, konnt de Ressortminister net soen. E Relevé hätt een am Mëttelstandsministère net gemaach.

De Leit an dem Secteur e bëssche Loft ginn

De Moien huet de Lex Delles och déi geplangten Ouvertureszäiten verdeedegt. Ënnert anerem d'Mënscherechtskommissioun hat déi an hirem Avis zum Covid-Gesetz kritesch hannerfrot. Andeems d'Terrassen um 6 Auer schonn zoumaache mussen, wéilt een den Afterwork ënnerbannen. Datt um 6 Auer moies dierf opgemaach ginn, wier un d'Enn vum Couvre-Feu gekoppelt, an dat géif de Leit d'Méiglechkeet ginn, virun der Aarbecht nach e Kaffi drénken ze goen. Dat hei ass keng Ouverture vum Horeca-Beräich, huet de Lex Delles betount, ma just eng Mesure, fir de Leit Loft ze ginn.

Mëttelfristeg Perspektiven net méiglech

Wat sinn d'Perspektiven fir d'Restaurateuren, Cafetieren an Hotelieren? Do konnt de Minister de Moien net vill dozou soen. Just déi generell Ausso, et géif een d'Neiinfektiounen, Hospitalisatiounen an eng Panoplie vun Indicateure kucken, fir ze decidéieren, wéini den Horeca-Secteur nees ganz opgoe kann. Et kéint kee Politiker op der Welt de Betraffenen soen, wéini et eriwwer ass an ob si an engem oder zwee Méint opmaache kënnen.

Eng generell Ouverture gekoppelt u Schnelltester ass den Ament keng Pist, där d'Regierung nogeet. Wann een all Kéiers e Schnelltest maache misst, fir eppes op enger Terrass ze drénken, géif de Kaffi dach relativ deier ginn, sou de Lex Delles. Et géifen och keng Iwwerleeunge gefouert, datt de Staat oder d'Restaurateure fir déi Schnelltester opkommen.

Independante solle verschidde Garantie kréien

An de leschte Méint gouf et notamment Divergenzen iwwert de Finanzement vun engem Revenue de remplacement fir Independanten. Divergenzen och tëscht de Regierungsparteien LSAP an DP. De Lex Delles huet de Moien erkläert, et géif virun allem drëm goen, fir deene Leit, déi sech trauen, sech ze lancéieren, Garantien ze ginn. Deen Ament misst een awer och genee definéieren, wie vu sou engem Revenu de remplacement profitéiere kann.

D'Stäerkt vun de Lëtzebuerger Aiden wier, datt se all puer Méint op de Leescht geholl ginn. Dat géif een och fir d'Zäit nom Juni maachen, wa se auslafen.

Invité vun der Redaktioun: Lex Delles

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.