En Donneschdeg de Moie war ee vun de Matbegrënner vun der Societéit Cannad'Our eisen Invité vun der Redaktioun.

Hanf vs Cannabis

Zanter 25 Joer baut den Norbert Eilenbecker Industrie-Hanf zu Kaalber am Éislek un an ass domadder Pionéier hei am Land. Zesumme mat sengem Associé, dem André Steinmetz, huet hien d'Societéit Cannad'Our gegrënnt. Den Hanf ass eng Notz-Planz, déi zanter Joerhonnerten eng ganz beléifte Ressource ass. Et misst een awer ënnerscheeden tëscht dem Hanf an dem Cannabis.

Mat dësen ënnerschiddleche Begrëffer géing ee sech eigentlech op déi nämmlecht Planz bezéien, d'Cannabis sativa L., mat ënnerschiddlecher Genetik. Déi männlech Cannabisplanz huet keng psychoaktiv Qualitéiten (niddregen THC-Gehalt) an ass dat, wat een ëmgangssproochlech als Hanf bezeechent. An déi weiblech Cannabisplanz, gëtt dacks als Cannabis bezeechent, also ass eigentlech psychoaktiv (héijen THC-Gehalt). (n.d.l.r)

"D'Hanfplanz ass sou villsäiteg. Alles wat drun ass, kann ee verschaffen," sou den Norbert Eilenbecker. Aus de Kären hätt ee vun Ufank u kal-gepressten Hanf-Ueleg gemaach, wat eigentlech och ee vun de beschte Liewensmëttel-Ueleger wier, dat um Maart ass.

Pionéier vum CBD an Europa

Virun 10 Joer hätt een dunn och erlaabt kritt, well d'Gesetz geännert gouf, nieft de Kären an de Stängelen och d'Bléien ze verschaffen. Doraus hätt een dunn Hanf-Téi gemaach. Dunn hätt een am Kanada de Rick Simpson gesinn, deen dat éischt Hanf-Konzentrat hiergestallt huet (mat héijem THC-Gehalt) an domat säin Hautkriibs geheelt huet. Aus Virwëtz hätt een du mat der selwechter Method och hei am Land CBD-Ueleg hiergestallt, awer mat manner THC a vill CBD. Mam André Steinmetz, deen deemools am Centre de recherche Santé geschafft huet, hätt een dunn e Mann fonnt, deen hinnen d'Produkt ofgeholl hätt an et virun un de Staatslabo ginn hätt fir Analysen. Do hätt een erausfonnt, dass de Lëtzebuerger Ueleg mann THC-Gehalt, dofir awer vill CBD-Gehalt hätt. Den André Steinmetz hätt dunn am Labo mam CBD an Zesummenhang mat Kriibs-Kulture geschafft. Am Reagenzglas hätt een du gesinn, dass bannent kuerzer Zäit all d'Kriibs-Kulturen duerch de CBD ofgestuerwe wären. Doriwwer wär ee wierklech glécklech gewiescht, sou den Norbert Eilenbecker. Doropshin hätt ee gemengt, et géing een eppes lasstrëppelen, mee dat wär awer du leider net esou gewiescht.

Notze vum CBD

Mëttlerweil géing gesot ginn, dass de CBD bei iwwer 40 Krankheeten eng positiv Wierkung hätt. De CBD ass entzündungshemmend, wierkt géint Péng a géing och bei Kanner-Epilepsie bal Wonner wierken, sou den Hanf-Bauer. D'Leit, déi CBD géingen nieft enger Chimio huelen, géingen déi da besser verdroen a se géing besser wierken. Donieft géing de Cannabidiol (CBD) och agesat gi bei Arthrose, bei Fibromyalgie, bei Epilepsie. A mëttlerweil géingen och scho vill Déiere CBD verschriwwe kréien. Do géing ee mat enger Déiereklinik vum Krakelshaff zesummeschaffen, erkläert den Invité. Och bei den Déiere géing de CBD fir Epilepsie an Arthrose agesat ginn.

Un der Grenz vun der Legalitéit

Mat der Produktioun vum CBD géing ee sech dacks un de Grenze vun der Legalitéit beweegen, well d'Gesetzer nun eemol sou wäre wéi se wären, sou den Hanf-Bauer. Et dierft een hei am Land just 0,3 Prozent an de Produkter hunn. Dat wier relativ wéineg, respektiv guer näischt. An der Schwäiz sinn awer zum Beispill Produite mat bis zu engem Prozent THC erlaabt. Eppes, wat ee sech och hei am Land géing wënschen, sou den Norbert Eilenbecker.

Déi lescht 2 Joer sinn immens vill CBD-Butteker an Automaten hei am Land opgedaucht. Do géingen allerdéngs keng Lëtzebuerger Produite verkaf ginn, betount den Norbert Eilebecker. Am Ausland géing de Cannabidiol mat CO2 eraus gepresst ginn. Eng Method, déi wesentlech méi einfach wär an dat kéint dann och op industriellem Niveau gemaach ginn an deemno wären déi Produkter da méi bëlleg a fir d'Geschäfter hei am Land méi interessant. Cannad'Our géing hiren CBD-Ueleg mat Alkohol extrahéieren. Donieft wären d'Bléien och mat der Hand gepléckt. Dat géing méi laang daueren, wär méi opwänneg, mee hätt dofir awer och Virdeeler (besonnesch, wat d'Wierksamkeet ugeet n.d.l.r), sou den Norbert Eilenbecker.

"Mir kéinten haut schonn e Medikament entwéckelt hunn..."

Zanter dem Ufank vun der Produktioun hätt ee mat der Santé a mam Staatslabo enk zesummegeschafft. Et hätt een ëmmer mat oppene Kaarte gespillt. Wéi ee bis gemierkt hätt, wat fir ee Potenzial an de Bléie vum Hanf géing stiechen, hätt ee wëllen e Projet lancéieren zesumme mat Luxinnovation, fir de ganze Spektrum ofzedecken. Et hätt een e Projet eraginn, mee ni eng Äntwert kritt.

Virun 3-4 Joer hätt een nach eemol e Projet bei d'Santé eraginn, fir zesumme mat der Santé, mat der Universitéit, mam Centre Hospitalier a mat den Dokteren d'Wierkung vum CBD z'analyséieren. Et hätt een haut scho kënnen e Medikament hunn, mee et hätt ee keng Äntwert kritt. Et wier einfach keen Interessi do gewiescht.

Et wéilt een och hei am Land medezinesche Cannabis produzéieren

Wei de Staat 2018 e Pilotprojet lancéiert huet, fir de medezinesche Cannabis hei am Land anzeféieren, wären déi zoustänneg Ministeren direkt a Kanada gefuer, fir de Cannabis vun do ze kafen.

"Mir waren natierlech net begeeschtert, wéi mer dat héieren hunn," sou den Norbert Eilenbecker. Besonnesch well iwwerhaapt net mat hinne geschwat gi wär, obwuel se souguer 2 Méint virdrun nach am Ministère gewiescht wären. Anerersäits kéint een et natierlech verstoen, well et den Ament den einfachste Wee gewiescht wier. Am Kanada wären et professionell Manager, déi och scho Pabeiere prett haten, déi Cannad'Our nach guer net hätt kënnen hunn.

Et wär een awer natierlech interesséiert drun, fir selwer hei am Land medezinesche Cannabis hierzestellen. Dat hätt een ebe wëllen an engem gréisser Kader, zesumme mat der Uni maachen. Mee et hätt een eben nach net déi sougenannt „good manufacturing praxis“, mee doru géing ee schaffen. Et hätt een och elo am Fréijoer een Architektebüro beoptraagt, fir ee Laboratoire ze plangen, deen de Konditioune géing entspriechen, fir dass een dat och kéint hei am Land produzéieren.

Dofir misst een dann Zäre bauen. Dat wär och mat engem gewëssenen Investissement verbonnen, ma dat kéint ee just maachen, wann ee Sécherheet vum Staat géing kréien an dat wär den Ament nawell ganz schwiereg, sou de Matbegrënner vun Cannad'Our.

Legaliséierung vum Cannabis

"Jetzt wird aus dem Steuer-Paradies ein Kiffer-Paradies", dat hätt den Noriichtespriecher owes op ARTE gesot, wéi de Grand-Duché annoncéiert hat, et wéilt een d'Legaliséierung vum Cannabis bis 2023 ëmsetzen, sou den Norbert Eilenbecker. Senger Meenung no hätt d'Regierung sech dat méi einfach virgestallt, wéi et schlussendlech ass. Dës Annonce hätt am Ausland immens héich Welle geschloen an et misst een ebe gewësse Reegelen hunn, sou eisen Invité, dee sech awer fir eng Legaliséierung ausschwätzt.

De Cannabis wier net gutt fir Jugendlecher, wou d'Gehier nach net komplett developpéiert ass, dat wär gewosst. Ma op der anerer Säit wär och bekannt, dass Leit, déi am Dag vill Stress haten an owes ee Kichelchen iessen oder eng fëmmen, dass dat déi ideal Aart a Weis wier, fir z'entspanen, sou den Hanf-Pionéier vu Lëtzebuerg.

Invité vun der Redaktioun: Norbert Eilenbecker

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.