© pixabay
De weltberüümten Trevi-Pëtz zu Roum ass nees op - awer net fir jiddereen. No 3 Méint Renovatiounsaarbechten ass d’Attraktioun elo reorganiséiert ginn, fir de Massentourismus besser ze steieren. Wat huet sech verännert, an wat bedeit dat fir d'Visiteure vun der italieenescher Haaptstad?
D'Fontana di Trevi, eng vun de bekanntsten Attraktioune vu Roum, zitt all Dag tëscht 10.000 an 12.000 Touristen un. Vill vun hinnen hale sech un d’Traditioun, eng Mënz an de Sprangbuer ze geheien, mat der Hoffnung, enges Daags e Wonsch erfëllt ze kréien. Mee d'Visitt vun dëser Ikon gouf elo op 400 Leit gläichzäiteg limitéiert. D'Autoritéiten hunn eng nei Reegelung agefouert: D'Entrée ass iwwert eng zentral Trap, an d'Sortie ass op der lénker Säit, Richtung Piazza dei Crociferi. D’Begrenzung vun de Leit ass allerdéngs net dat eenzegt. D'Autoritéiten hunn och eng Rei nei Reegelen agefouert. Iessen, drénken a fëmme si virum Pëtz verbueden an och d'Setze um Bord ass net méi erlaabt. Duerch all dës Moossname soll de Problem vum Massenandrang geléist ginn.
D’Stadverwaltung stécht nach viru villen Erausfuerderungen. D'Hellegt Joer 2025 steet virun der Dier, an dofir gëtt eng riseg Zuel vu Pilger erwaart. Iwwer 30 Milliounen zousätzlech Touriste kënne Roum an déi normalerweis schonn iwwerfëllte Plazen an der Stad nach weider belaaschten. Dobäi kënnt, datt d’Stroossen, d'Infrastrukturen an och d’Verkéiersmëttel net ëmmer capabel sinn, fir esou e Massen ze packen. D’Renovatioun vum Trevi-Pëtz an d’Reorganisatioun vu Roum sinn Deel vun enger gréisserer Campagne, fir d’Stad op d’Hellegt Joer virzebereeden. Ob d’Stad et fäerdegbréngt, déi erwaarten Erausfuerderungen unzegoen, bleift ofzewaarden. Fir d’Touristen a Pilger heescht et awer schonn elo: d’Reegelen respektéieren, d’Schéinheet vun der Stad genéissen an e Moment vun historescher a kultureller Bedeitung erliewen.
Domat bleift Roum net nëmme Symbol vun der Antikitéit, mee och eng modern Stad am Kampf géint d’Erausfuerderunge vum Massentourismus.
