© Skunk Anansie
Skunk Anansie spillen dëst Joer endlech erëm Concerten. Freides den 21. Mäerz kënnt déi brittesch Band bei eis op Lëtzebuerg an den Atelier!
Mëtt vun den 90er suerge Skunk Anansie mat hire politeschen, feministeschen an antirassisteschen Texter fir Oprou an der Musekszeen. Direkt mam Debut-Album "Paranoid & Sunburnt" huet d'Band ronderëm déi ikonesch Frontfra Skin Erfolleg a ganz Europa. D'Single-Auskopplung "Hedonism (Just Because You Feel Good)" gëtt ee groussen Hit a mécht d'Band beim Mainstream-Public bekannt. Den Numm "Skunk Anansie" ass iwweregens ofgeleet vun der mythescher westafrikanescher Figur "Anansi", dem Spannemann, a "Skunk", den Numm vun enger Cannabiszort an dat englescht Wuert fir Sténkdéier.
No de weidere groussen 90er-Hits "Weak", "Charity" oder "Selling Jesus" léise Skunk Anansie sech 2001 op. D'Memberen hu sech op Solo-Projete fokusséiert, ënnert anerem huet d'Sängerin Skin zwee Solo-Alben erausbruecht. 2009 dunn déi grouss Reunion: Skunk Anansie releasen de Greatest Hits-Album "Smashes and Trashes" a spillen eng Tournée duerch ganz Europa.
No hirer Reunion hu Skunk Anansie nach dräi weider Studio-Alben an ee Live-Album erausbruecht. 2016 ass dee bis elo leschte Longplayer "Anarchytecture" erauskomm. Säitdeem huet d'Formatioun wuel e puer eenzel Singles verëffentlecht, awer kee weideren Album annoncéiert. Trotzdeem si Skunk Anansie nach ëmmer immens populär, hire Concert am Atelier den 21. Mäerz ass komplett ausverkaaft!
