E Méindeg den Owend stoungen zu London am Alexandra Palace déi zwou Halleffinalle vun der Darts-WM um Programm.

An der 1. Halleffinall koum et zum Duell tëscht dem "Snakebite" Peter Wright an dem fréiere Rugby-Spiller Gerwyn Price. An der 2. Partie huet den Titelverdeedeger Michael van Gerwen et mam Nathan Aspinall aus England ze di kritt.

D'Finall heescht Michael van Gerwen géint Peter Wright a gëtt traditionell den 1. Januar gespillt.

Nathan Aspinall - Michael van Gerwen 3:6 (2:3, 3:1, 2:3, 3:2, 2:3, 0:3, 3:0, 2:3, 1:3)

"The Asp", den Nathan Aspinall goung als kloren Underdog an de Match géint de Weltmeeschter Michael van Gerwen. Den Hollänner hat géint ee staarke Géigner, dee sech géint den Toppfavorit gutt gewiert huet, nawell seng Schwieregkeeten. Dobäi koum, datt den "MVG" net säi beschten Dart gespillt huet, ma et dunn awer duergaangen ass fir den 28 Joer alen Englänner ze schloen. Et gëtt also e Mëttwoch d'Neioplo vun der Finall 2014: "MVG" van Gerwen géint "Snakebite" Wright.

Peter Wright - Gerwyn Price 6:3 (3:2, 2:3, 1:3, 3:0, 3:2, 1:3, 3:2, 3:1, 3:2)

En extreem spannenden an och ausgeglachene Match hunn d'Darts-Fans am "Ally Pally" zu London tëscht dem Schott Wright a walisesche Spiller Price mat erlieft. Zemools am 3. Saz goung et hin an hier, huet den "Iceman" Price de "Snakebite" dach e puer Kéiere kënne breaken.

Am weidere Verlaf huet de Price awer nogelooss an dem Wright ëmmer nees d'Chance ginn, de Match ze entscheeden. Ma 7 Matchdarts huet et gedauert, éier schliisslech de Wright et mat der Victoire fir déi 2. Kéier a senger Karriär an d'Finall gepackt huet. Bei der 1. Kéier am Joer 2014 hat hie géint de van Gerwen verluer, deen deemols fir d'éischte Kéier Weltmeeschter gouf.