Déi zwou Lëtzebuergerinnen hu sech kloer mat 3:1 géint hir Géignerinnen aus Ungarn duerchgesat.

En Dënschdegnomëtteg hu sech d'Ni Xia Lian an d'Sarah De Nutte mat 3:1 géint Balint/Hartbrich aus Ungarn behaapt a stinn elo an der Aachtelsfinall. E Mëttwoch treffe si op d'Serbinnen Lupulesku/Vignjevic.

Souwuel d'Sarah de Nutte ewéi och d'Ni Xia Lian ware fir 1/32-Finalle gesat. Dowéinst hu si net missen an der Virronn untrieden. Net gesat waren dogéint d'Tessy Gonderinger an d'Ariel Barbosa. Allebéid hu si missen an enger Grupp mat zwou anere Kontrahentinnen untrieden a sech fir den Haapttableau qualifizéieren.

D'Tessy Gonderinger konnt sech an hirer Grupp géint d'Norwegerin Martine Toftaker an d'Italienerin Debora Vivarelli duerchsetzen an dat, obscho si géint d'Norwegerin verluer hat. Dës huet allerdéngs géint d'Italienerin verluer, soudatt et fir d'Tessy Gonderinger schlussendlech op ee Punkt duergoe sollt a si sech als Éischt an hirer Grupp qualifizéiere konnt.

D'Ariel Barbosa huet sech an hirer Grupp souwuel géint d'Ungarin Leonie Hartbrich souwéi och géint d'Finnin Anna Kirichenko misse geschloe ginn. Um Enn beleet si an hirer Grupp déi drëtt Plaz.

Eng staark Leeschtung, allerdéngs ouni Erfolleg gouf et bei de Lëtzebuerger Hären. Weder de Luka Mladenovic nach den Eric Glod hunn de Sprong an d'1/32-Finalle gepackt. Fir si ass den Turnéier domadder am Eenzel eriwwer.