An der Véierelsfinall hu si sech a 4 Sätz mat 3:1 géint d'Koppel Källberg/Bergström aus Schweden duerchgesat.

Nächste Coup vum Ni Xia Lian a vum Sarah De Nutte op de European Championships zu München. D'Lëtzebuerger Dëschtennis-Koppel steet am Dubbel an der Halleffinall. Si wannen e Mëttwoch de Mëtteg a 4 Sätz mat 3:1 géint déi schwedesch Koppel Källberg/Bergström. D'Halleffinall géint déi rumänesch Koppel Elizabeta Samara an Andreea Dragoman ass en Donneschdeg de Mëtteg.

E Mëttwoch de Moie schonn hat si sech an den Aachtelsfinalle mat engem 3:1 géint de serbeschen Duo Lupulesku/Vignjevic duerchgesat.

Eenzel-Competitioun

An den 1/32-Finallen am Eenzel konnt sech d'Ni Xia Lian mat 4:1 géint d'Bulgarin Polina Trifonova duerchsetzen. Duerch dës Victoire huet si sech den Ticket fir d'European Games 2023 zu Krakau geséchert. An der Ronn vun de leschten 32 Spillerinne kritt d'Lëtzebuergerin et en Donneschdeg um 15.45 Auer mat der 18 Joer ale Franséisin Prithika Pavade ze dinn.

D'Tessy Gonderinger huet sech am selwechten Tour mat 1:4 géint d'Italienerin Giorgia Piccolin misse geschloe ginn. Och fir d'Sarah De Nutte ass den Eenzel-Turnéier schonn an den 1/32-Finallen eriwwer. Si huet knapp mat 3:4 géint d'Englännerin Ho Tin-tin verluer.

Iwwerdeems hu sech och de Luka Mladenovic an d'Ni Xia Lian duerch hir Plaz an den Aachtelsfinalle vum Dubbel-Mixed den Ticket fir d'European Games geséchert.