Um Sonndeg goufen an der Coque bei den Dammen a bei den Hären d'Finalle vun der Coupe am Dëschtennis gespillt.

Bei den Häre konnt Hueschtert-Folscht sech an der Coque mat 4:2 géint Recken duerchsetzen.

No enger spannender Finall kréint sech Hueschtert-Folscht fir déi éischte Kéier an der Veräinsgeschicht zum Coupe-Gewënner. D’Ekipp ronderëm de Lëtzebuerger Maël van Dessel huet d’Finall mat 4:2 géint den DT Recken gewonnen. Op Säite vu Recken konnt eenzeg den Thomas Keinath seng Matcher gewannen.

Bei den Dammen war d'Coupe-Finall no genau 45 Minutten decidéiert. Mat 4:0 gewannen d'Damme vu Rued souverän géint Ettelbréck.

D'Tessy Gonderinger an d'Dani Konsbruck hunn hir Matcher géint d'Dominique Kieffer an d'Ni Xiao Jing mat 3:0 gewonnen, ier d'Laura Burcheri an enger enker Partie géint d'Aline Kuffer den Deckel drop gemaach huet.

Domat gewënnt Rued d'Coupe bei den Damme fir déi sechste Kéier a fir d'zweet noeneen.