Dee franséisch-belsche Bestsellerauteur huet am Stater Jongelycée virun engem grousse Public iwwer seng literaresch Aarbecht geschwat.

Et ass net alldeeglech, dass en international bekannte Bestsellerauteur op Lëtzebuerg kënnt, a sech dann e ganzen Nomëtteg Zäit hëllt, fir ze liesen, op d'Froe vun de Schüler ze äntweren a seng Bicher ze signéieren. Den Eric-Emmanuel Schmitt, 1960 zu Sainte-Foy-lès-Lyon (Rhône) gebuer, a mëttlerweil zu Bréissel doheem, konnt de Public deen sech e Freideg de 17te Juni am Festsall vum Jongelycée afonnt hat, begeeschteren:

Stëmmen aus dem Public

Dass dem Eric-Emmanuel Schmitt, säi Public, an zemol säi jonke Public, ganz wichteg ass, dat war net ze iwwersinn. An no dem 4 Stonne laange Marathon-Event hat hien och nach Zäit fir op e puer Froen ze äntweren. A Schoulen ze goen, a sech mat Schüler ze ënnerhalen, dat läit him um Häerz:

EES sur ses jeunes lecteurs

"Oscar et la dame rose", "Monsieur Ibrahim et les fleurs du Coran" oder déi autobiografesch Erzielung "La Nuit de feu" , dat sinn nëmmen e puer vu ronn 40 Titelen déi och a grad esou vill Sproochen iwwersat goufen. Wann e sech grad a senge bekanntste Wierker dacks ganz kuerz faasst, dann ass dat bei sengem aktuelle Projet ganz anescht. D'Iddi fir dësen Epos ass him virun 30 Joer komm. "La Traversée des temps" ass e Roman an 8 Bänn, vun deenen der 2 ("Paradis perdus" an "La Porte du ciel") scho verëffentlecht sinn, deen drëtte Band soll am November erauskommen. Haaptpersonnage ass den Noam, Jong vun engem Clan-Chef aus dem Neolithikum, dee viru ronn 8000 Joer gebuer gouf an den onstierflech ass. Den Titel "La Traversée des temps" ass also duerchaus wuertwiertlech ze huelen. Säi Wee duerch d'Zäit féiert den Noam a seng Begleeder duerch déi verschidden historesch Epochen, vun der Steenzäit iwwert d'Ägypten vun de Pharaonen, dat aalt Roum, d'Mëttelalter an d'Renaissance bis an eis Zäit. Eng Fro steet hei fir den Auteur am Mëttelpunkt

EES: "Comment on en arrive là?"

Fir e Schrëftsteller ass d'Sprooch esou eppes wéi säin Handwierksgeschir, seng Matière Première mat der hien sech all Dag op en Neits auserneesetze muss. Fir den Eric-Emmanuel Schmitt bedeit d'Sprooch, virun allem déi franséisch Sprooch, awer nach vill méi:

EES: "Le français, c'est ma partenaire"

Wéi d'Initiatorin vum Projet Café Littéraire am LGL, d'Franséisch-Proff Stéphanie Duchaine, erkläert, soll och d'nächst Joer e bekannten Auteur(in) an den Jongelycée invitéiert ginn. Wien dat ass, dat wollt si awer nach net verrooden.

RTL

© Stéphanie Duchaine

RTL

© RTL/Bea Kneip

RTL

© Stéphanie Duchaine