Dolly Parton – en Numm, eng Stëmm, eng Legend. Gebuer 1946 an den Tennessee Mountains, ass si an enger aarmer Famill mat zwielef Kanner opgewuess. Mee si hat en Dram: mat hirer Musek d'Welt erueweren. Hir Kandheet an hir Famill goufen zu enger wichteger Inspiratioun fir hir Lidder. „Coat of Many Colors“ erzielt d'Geschicht vun engem Mantel, deen hir Mamm aus klenge Stoffstécker zesummegebitzt hat – e Lidd iwwer Léift, Stolz an d'Wäerter vum Liewen.
Mat Lidder wéi „Jolene“ an „I Will Always Love You“ gouf Dolly Parton weltberüümt. Si war awer net nëmmen eng aussergewéinlech Songwriterin a Sängerin, mee och eng erfollegräich Schauspillerin. Am Film „9 to 5“ huet si 1980 nieft Jane Fonda a Lily Tomlin gespillt. De Song mam selwechten Titel gouf zu engem Hymne fir Fraen, déi sech op der Aarbecht behaapte wëllen.
An da war do nach „Islands in the Stream“, hiren onvergiesslechen Duett mam Kenny Rogers aus dem Joer 1983. D'Lidd, geschriwwe vun de Bee Gees, gouf zu engem internationale Succès. Déi zwou Stëmme passen esou gutt zesummen, datt de Song bis haut zu de bekanntsten Duetter vun der Pop- a Countrymusek gehéiert.
Mee d'Dolly Parton huet net nëmme mat hirer Musek Spueren hannerlooss. Mat hirer Imagination Library huet si sech dofir agesat, datt Kanner gratis Bicher kréien an d'Freed um Liesen entdecken. De 25. August 2026 ass d'Dolly Parton am Alter vun 80 Joer gestuerwen. Si hannerléisst eng immens musikalesch Ierfschaft, vill Humor an e Beispill vu Generositéit.
Dolly Parton ass net méi bei eis. Mee hir Lidder bleiwen. An esou wäerte mir hir Stëmm nach laang héieren – an hir ni ganz vergiessen.
