An der siwenter Ronn soll den Effekt, deen déi aktuell Pandemie op d’Sprooch huet, méi genee dokumentéiert ginn.

Nom grousse Succès vun den éischte Ronnen an de leschten zwee Joer vun der Schnëssen-App vum Institut fir lëtzebuergesch Sprooch- a Literaturwëssenschaft vun der Universitéit Lëtzebuerg ass een elo well bei der siwenter Ronn vun Erhiewungen iwwert den aktuelle Sproochgebrauch am alldeegleche Lëtzebuergeschen ukomm.

Jiddereen, dee Spaass oder Interessi un der Sprooch huet, ka matmaachen. Et ass e klengen Zäitverdreif, deen der Fuerschung hëlleft. Aktuell leeft an der Schnëssen-App eng Spezialeditioun zum Theema Covid-19: Et waarde vill nei Sätz, Biller a Froen op den Utilisateur.

Mat dësen Iteme wëll d’Ekipp vun der Uni den Effekt, deen d’Pandemie forcement och op d’Sprooch huet, méi genee dokumentéieren an d’Variatioun, déi och hei eng Roll spillt, erfuerschen.

Den Zenter fir d’Lëtzebuerger Sprooch huet an deem Kontext jo och schonn e Glossaire ausgeschafft an an de Lëtzebuerger Online Dictionnaire integréiert.

D’Schnëssen-Ekipp sicht awer och nach ëmmer Leit, déi hir Sprooch der Fuerschung „spenden“, fir d’Dialekter am Lëtzebuergeschen ze dokumentéieren (Ronnen 1 an 2).

Mam neien Update kann een iwweregens elo och Opname mam Tablet maachen. D’App ass natierlech gratis a ka fir Android an iOS um Handy oder Tablet installéiert ginn.

Et kann ee sech och scho Resultater vun den Erhiewungen ukucken: direkt an der App oder op https://infolux.uni.lu/schnessen/auswaeertungen/.

RTL.lu huet scho méi dacks doriwwer informéiert. Éischt Kaarte fënnt een am neie Sproochatlas, deen am Gaangen ass, mat de Schnëssen-Donnéeën opgebaut ze ginn.