D’Zuel vun den Auslänner – dorënner, an dësem Fall, och Lëtzebuerger – déi hei am Land Portugisesch-Coursë besichen, ass geklommen.

Dat seet de Joaquim Prazeres, Coordinateur vum portugisesche Sproocheninstitut Camões.

Et ass eng Sprooch, déi een hei am Land méi dacks héiert. Ma weltwäit gëtt Portugisesch vu méi wéi 280 Millioune Leit geschwat. Fir dëst ze feieren, gouf 2009 de Weltdag vun der portugisescher Sprooch agefouert. Dëse gëtt zanter hir all Joer, um  5. Mee, gefeiert.

Och de Steve Lauer schwätzt Portugisesch. Ween awer denkt, datt hie Portugis ass, deen iert sech. Déi laténgesch Sprooch läit dem gebiertege Lëtzebuerger einfach um Häerzen. A sengem Café zu Bouneweg steet Portugisesch deemno op der Kaart. Do gëtt et nämlech nieft der Hunnegdrëpp natierlech och Superbock, Porto a Co.

Geléiert huet de Steve Lauer d‘Sprooch mat senge Kolleegen am Futtball a spéiderhi mat senger Partnerin. Schwätzen deet hien et am Alldag mat senge Kanner, Clientë a Mataarbechter.

Esou wéi de Steve huet och den RTL-Sport-Journalist Mike Fandel Portugisesch um Futtballfeld geléiert. Hie setzt seng Sproochkenntnisser souwuel a sengem privaten Entourage, wéi och am professionelle Milieu ëm.

Donieft hu mir nach mam Pol Lenertz geschwat, dee Schoulmeeschter an der Spillschoul zu Fenteng ass. Hien ass an Owescoursë gaangen, fir kënne mat de Lusophonë matzeschwätzen.

Portugisesch-Coursë ginn et zu Lëtzebuerg zanter ville Jore, dacks bekannt als „Portugisescher Schoul“. Den Ament sinn hei am Land ronn 3.000 Schüler a Schülerinne vu Préscolaire bis Lycée an de Portugisesch-Coursen ageschriwwen. Dobäi ënnerscheet een tëschent 3 Formater: dem Enseignement intégré, parallel oder complémentaire.

Wéi eng Schoul hei am Land wéi ee Format ubitt, dat fënnt een op der Säit vum portugisesche Sproocheninstitut Camões.