Mir hätten dann elo de Škoda Enyaq RS am Alldag Test fir iech. Dee gouf jo d'lescht Joer schonn iwwerschafft, an elo war en an d'Automag-Redaktioun komm. De Christian Schmit mat de Fuerimpressiounen.
E kann ee scho gläich virop soen, eng gutt Impressioun huet den Enyaq hannerlooss. Dee Modell aus der Škoda-Gamme ass och bei der Clientèle ganz beléift an huet ganz gutt Verkafszuelen. E gehéiert zu den erfollegräichsten Elektro-SUV a koum 2025 op nobäi 80.000 Venten, a rangéiert op Plaz 7 an der Top 10 .
Effektiv, d'lescht Joer koum schonn de Facelift, mat der neier Front ass en elo méi elegant. Mee e Škoda muss natierlech och praktesch sinn, a Plaz an d'Präis-Leeschtungsverhältnis musse stëmmen.
Also di Zäite wou Škoda di bëlleg Alternativ am VW-Grupp war, déi ass längst passé. Mee vill Auto fir d'Geld gëtt et awer, gekréint mat ville clevere Léisungen, Allrad Traktioun a mam RS-Package a Look. An zu Mlada Boleslav an Tschechien do gëtt präzis geschafft. Veraarbechtung op héijem Niveau. Wichteg, well den Enyaq ass jo en Elektroauto, an do héiert ee jo bekanntlech all Geräisch.
De Škoda Enyaq ass am Alldag en agreabele Gesell, dee vill Plaz vir an hanne bitt, kee Probleem domat huet wann d'Akeef méi grouss ausfalen, a mat deem een och genuch Power huet, och dann nach, wa méi Passagéier u Bord sinn.
A propos, wat steet dann op der Leeschtungsskala?
Also den Enyaq hält 340 PS parat, jo domat ass een anno 2026 mat vir bäi, an nawell koume mir zäitweis op e Verbrauchswäert vun 16kW, wat remarkabel ass. 560km Autonomie sollen dra sinn, déi hu mir zwar net erreecht. An net mol 6 Sekonnen ass een op 100, mee bei 180 à l’heure ass Schluss.
Manner gutt Resultater bei der Luedtechnik. 185kW maximal, dat ass net immens. Mee dee vill zitéierte Fuer Spaass ass garantéiert. Feedback bei Lenkung a Fuerverhalen harmonéieren. Getest hei am Land, an op Ausflich déi Säit der Grenz mat ville Kéieren.
Fazit a Präisser fir den E-SUV?
Also en eegent sech duerchaus fir Familljen, well e ka sportlech gefuer ginn, ouni Sportswon wëllen ze sinn. Mat den 20 Zoll Felgen mécht e bien sûr eng gutt Figur, de Confort op de Sportsëtzer bleift net op der Streck, an d'Faarf "Velvet-Red" um Testauto steet ëm gutt. Fir esou e Škoda Enyaq RS an der Garage ze hunn, missten dann op d'mannst 55.000 Euro de Besëtzer wiesselen.
