D'Brics-Staaten hu keng nei gemeinsam Wärung lancéiert

An enger Rëtsch Bäiträg gëtt behaapt, d'Grupp hätt eng nei Wärung ageféiert, woubäi Fotoe vu Billjeeën oder Taux-de-changen als Beleeg déngen. Dat ass awer falsch.

Et gouf keng gemeinsam Wärung an Ëmlaf bruecht, wéi Experten a Membere vun der Institutioun géintiwwer der AFP confirméiert an dorop higewisen hunn, dass sech d'Iddi vun engem vum Dollar befreite Bezuelsystem nach am Projetsstadium befanne géif.

D'Brics-Grupp (Brasilien, Russland, Indien, China a Südafrika), déi gegrënnt gouf, fir d'Weltuerdnung zu Gonschte vum "globale Süde" géintiwwer dem Westen auszegläichen, gouf zënter 2023 ëm Ägypten, d'Vereenegt Arabesch Emirater, Äthiopien, den Iran an Indonesien erweidert.

Zënter hirem alleréischte Sommet de 16. Juni 2009 zu Jekaterinburg (Russland) hunn d'Länner vun der Allianz d'Entdollariséierung vun hiren Ekonomien zu hirem wichtegste Projet gemaach. D'Iddi ass, den Dollar, dee weltwäit als Referenz gëllt, net méi fir den Handel tëschent de verschiddene Memberstaaten ze benotzen (Link hei archivéiert).

De Wëllen, dëse Projet ze konkretiséieren, huet sech zënter dem Ufank vum Krich an der Ukrain an de westleche Sanktioune géint Russland, ee vun de Grënnungsmemberen, verstäerkt. Den Handelskrich, deen den US-President Donald Trump zënter sengem Retour an d'Wäisst Haus ugefaangen huet, huet sech an den Debatte vun der Grupp opgedrängt, déi mëttlerweil bal d'Hallschent vun der Weltbevëlkerung a ronn 40 Prozent vum weltwäite PIB representéiert.

"Ech denken, d'Welt muss e Wee fannen, dass eis Handelsbezéiungen net méi op dem Dollar baséieren", sot de brasilianesche President Lula da Silva um zweeten Dag vum 17. Brics-Sommet, dee vum 6. bis de 7. Juli 2025 zu Rio stattfonnt huet (Video op Portugisesch hei archivéiert).

An dësem Zesummenhang behaapten zënter Enn Juli eng Rëtsch Bäiträg a Sozialen Netzwierker, dass eng gemeinsam Wärung ageféiert gi wär.

E Bäitrag op der Plattform X, dee méi wéi dausend Mol geliket gouf, weist e Screenshot vun engem Système de change, deen d'Méiglechkeet huet, d'Wärung vun de Brics-Staaten, déi sougenannt "Brics Chain", ze kafen. Dem Auteur vun der Publikatioun no géif eng "Brics Chain" Enn Juli fir 26,01 USD gehandelt ginn (Link hei archivéiert).

"D'Brics-Staate féieren hir eege Wärung an, fir der Dominanz vum Dollar ze entkommen", behaapt och en Internetnotzer op TikTok an der Iwwerschrëft vun engem kuerze Video, deen e Geldschäin mat de Fändele vun de fënnef Brics-Memberstaate weist (Video hei archivéiert).

Déi selwecht Sequenz gëtt an engem Facebook-Post gewisen, an deem e senegaleeseschen Internetnotzer vun enger "zukünfteger Brics-Devise" schwätzt, déi geschwënn ageféiert ginn an "den US-Dollar an de Schiet stelle" soll (Link hei archivéiert).

Aner, méi al Bäiträg gi vir, 50-Brics-Billjeeën ze weisen, wéi zum Beispill en TikTok-Bäitrag, dee méi wéi 13.500 Kommentare gesammelt huet, oder en 100-Brics-Billjee, deen angeeblech vum russesche President Wladimir Putin an d'Luucht gehale gëtt (Links hei an hei archivéiert).

Dës Bäiträg loossen de falschen Androck zou, dass d'Brics-Staate schonn eng gemeinsam Wärung ageféiert hätten oder dat deemnächst maache géifen. Dat ass falsch, hunn d'brasilianesch Brics-Presidence an eng Abberzuel vun Ekonomiste géintiwwer der AFP betount.

"Falsch Informatiounen"

Zënter hirem éischte Sommet am Joer 2009 hunn d'Brics-Staate reegelméisseg erkläert, dass si eng Méiglechkeet fir d'Entdollariséierung vun hiren Ekonomië schafe wëllen. Op dem 14. Brics-Sommet am Joer 2022 hat de Wladimir Putin beispillsweis vun der Noutwendegkeet geschwat, eng "nei Weltwärung fir Reserven" ze schafen (Link hei archivéiert).

Am Juni 2023, um Sommet fir en neie Finanzpakt zu Paräis, hat de brasilianesche President Lula da Silva dann ëffentlech d'Iddi vun enger gemeinsamer Wärung nom Virbild vum Euro nees opbruecht, fir den Handel bannent de Brics-Staaten ze erliichteren. Am August 2023 stoung de Projet offiziell op der Dagesuerdnung vum Brics-Sommet zu Johannesburg, wou en als Mëttel fir d'Ëmgoe vun der Dollar-Hegemonie a fir d'Demonstratioun vu wirtschaftlecher Eenheet virgestallt gouf (Link hei archivéiert).

Zënterhier gouf d'Fro vun der Entdollariséierung vum Handel méifach ugeschwat, sou och um Sommet zu Kasan am Joer 2024. Bis elo gouf awer keng gemeinsam Wärung ageféiert.

Eng Stéchwierdersich mat de Wuertgruppen "Aféierung Brics-Wärung" + "nei Brics-Wärung" weist, dass a leschter Zäit keng offiziell Annoncen duerch d'Press gaange sinn. Och an den 126 vun der AFP ënnersichte Punkte vun der Deklaratioun vu Rio, déi um Enn vum Sommet am Juli 2025 adoptéiert gouf, gëtt esou eng Wärung net ernimmt (Link hei archivéiert).

"Et ass falsch ze soen, dass d'Brics-Staaten eng eegen Devise kreéiert hunn, an esou eng Propos gëtt aktuell net gepréift", huet de Presseservice vun der brasilianescher Brics-Presidence géintiwwer der AFP confirméiert. "Dat kann an den offiziellen Dokumenter vum Rio-Sommet iwwerpréift ginn, wou dëse Sujet mat kengem Wuert ernimmt gëtt" (Link hei archivéiert).

De Presseservice huet déi vun der AFP iwwerpréift Publikatiounen als "Falschinformatiounen a Rumeuren, déi eenzeg an eleng dorop ofzilen, d'Ëffentlechkeet ze täuschen an d'Meenung ze manipuléieren", bezeechent.

D'Entdollariséierung vum Handel bannent de Brics-Staate befënnt sech nach an der Planungsphas, an eng gemeinsam Wärung war wuel eng Kéier am Gespréich, existéiert awer bis elo net.

Pläng fir eng international Bezuelddevise

D'Memberlänner vun der Allianz denken iwwer "eng international Bezueldevise no, fir international Transaktiounen" ënnerteneen ofzewéckelen an "ouni den Dollar auszekommen". Dat dierf awer net mat "enger interner oder bannenzeger Bezueldevise, wéi mir se an der Europäescher Unioun hunn", verwiesselt ginn, wou een zum Beispill zu Paräis oder Athen seng Akeef boer oder mat der Kreditkaart an Euro bezuele kann, sou de Jean-François Ponsot, Professer fir Ekonomie op der Université Grenoble Alpes, den 28. August 2025 géintiwwer der AFP.

"Et ass en utopesche Projet fir d'Brics-Staaten, eng gemeinsam Wärung wéi den Euro ze hunn, well et sech ëm Länner handelt, déi vill ze ënnerschiddlech sinn an net genuch vereent sinn", huet hie bäigefüügt. "Wat een am Moment an de Sozialen Netzwierker gesäit, si virun allem Ausdréck vu Billjeeën, dat ass Kommunikatioun a Propaganda."

Den Ekonomist vum CEPII, de Carl Gekou, huet sengersäits géintiwwer der AFP vun "enger Extrapolatioun vun enger echter Projetsiddi fir eng gemeinsam Wärung" geschwat, "déi nach net d'Liicht vun der Welt erbléck huet, déi awer d'Liicht vun der Welt erblécke kann, wann et dëse Staate jeemools gelénge sollt, sech ze eenegen, andeem si de politeschen an technologesche Prozess duerchlafen, deen d'Aféiere vun enger neier Wärung erfuerdert".

D'brasilianesch BRICS-Presidence behaapt dogéint: "Wat am Moment diskutéiert gëtt, ass d'Méiglechkeet, Handelstransaktiounen tëschent de Memberlänner ënner Benotzung vun hiren eegenen nationale Wärungen ze erméiglechen, wéi de President Lula da Silva kierzlech op enger Pressekonferenz nom Brics-Sommet zu Rio de Janeiro erkläert huet" (Link hei archivéiert).

Vun enger gemeinsamer Wärung an de Memberlänner, déi wéi den Euro wär, ass een awer nach wäit ewech. Awer op wat baséieren dann d'Biller, déi vun de virale Publikatiounen als Beweis ugeféiert ginn?

Billjeeën an inoffiziellt Kryptogeld

A Wierklechkeet verweisen d'Visualiséierunge vun den angeebleche BRICS-Billjeeën op gefälscht Geldschäiner, déi symbolesch hiergestallt goufen, fir Diskussiounen iwwer d'Entdollariséierung ze fërderen. An op den Taux de change vum "Brics Chain", op eng obskuer Kryptowärung, déi näischt mat der ekonomescher Allianz vu Brics ze dinn huet.

Eng ëmgekéiert Billersich nom Bild vum Wladimir Putin, deen en angeebleche Billjee an d'Luucht hält, dat am Moment op TikTok d'Ronn mécht, huet d'AFP zu enger vun de Fotoe geféiert, déi op der offizieller Internetsäit vum 16. BRICS-Sommet publizéiert gouf. D'Foto vum russesche President gouf bei dëser Geleeënheet geschoss (Link hei archivéiert).

Eng Rëtsch Staatsmedien (hei an hei) haten deemools dorun erënnert, dass et sech ëm e "gestallten" oder "symbolesche" Billjee gehandelt huet. D'AFP hat iwweregens schonn am November 2024 an engem engleschen Artikel zu dësem Sujet recherchéiert.

Eng weider ëmgekéiert Billersich, déi d'AFP unhand vun engem kuerzen TikTok-Video, deen en 200-BRICS-Schäin weist, duerchgeféiert huet, huet se ënner anerem zu engem Artikel vun der op Devisen a Kryptowärunge spezialiséierter Internetsäit Watcher.guru geféiert (Link hei archivéiert).

"Dësen 200-Brics-Billjee ass net echt an huet just symbolesche Wäert. De russesche President Wladimir Putin hat dëse gestallte Billjee um Internationale Wirtschaftsforum 2025 vu Sankt Petersburg (SPIEF) virgestallt", sou den Auteur.

Och Publikatiounen, an deene behaapt gëtt, dass déi nei gemeinsam Brics-Wärung zu engem Taux vun enger "Brics Chain" fir 26 Dollar gehandelt géif, sinn ierféierend. D'"Brics Chain" ass eng reelle Kryptowärung, huet awer näischt mat der Wirtschaftsorganisatioun vun de BRICS-Staaten ze dinn (Link hei archivéiert).

Se gëtt weeder op der Informatiounssäit vu Brics nach op der Säit vum jéngste Sommet zu Rio ernimmt. D'"Brics Chain" ass "keen offizielle Projet vun de Brics", wéi den Alexander Stachtschenko, Strategiedirekter bei Paymium, enger Plattform fir de Kaf a Verkaf vu Verméigenswäerter a Kryptowärungen, géintiwwer der AFP verséchert huet.

Dës Kryptowärung "gesäit ganz no engem schlechten Eenzelprojet oder souguer no engem Bedruch aus", mengt hien. "Den Twitter-Kont [haut X, Um. v. d. Red.] gouf 2021 opgemaach an huet gewëss Praktiken, deenen hiren eenzegen Zweck et ze si schéngt, de Präis" vun hirer Wärung unzekierpen, huet den Expert bäigefüügt (Link hei archivéiert).

Nach an der Planungsphas

De Plang, eng supranational Wärung anzeféieren, fir Handelstransaktiounen tëschent de Memberlänner ofzewéckelen, ass dem Ekonomist Jean-François Ponsot no "ëmmer nach aktuell". "Awer tëschent den Intentiounen an deem, wat konkreet geschitt, gëtt et e grousst Lach, well et net esou evident ass, en alternative System zum Dollar en place ze setzen", huet hie bemierkt.

Virun allem, wann zéng sou ënnerschiddlech Länner mat ënnerschiddleche wirtschaftlechen Intressie sech op dee Sujet eenege mussen. "Et gesäit een däitlech, dass Indien iwwerhaapt net mat China a Russland iwwereneestëmmt, fir bei dësem Projet net ze wäit ze goen", huet den Expert zum Beispill erkläert. Am Moment "gëtt et just eng Saach, déi si eent", stellt hie fest, "nämlech d'Benotze vum Dollar op internationalem Niveau ze kontestéieren".

Et ass net déi éischt Kéier, dass d'AFP Rumeuren iwwer d'Aféiere vun enger gemeinsamer Wärung fir e Block vu Länner iwwerpréift huet. Ufank 2024 haten ierféierend Publikatioune behaapt, d'Iddi fir Billjeeë vun der "gemeinsamer Wärung" fir d'Memberstaate vun der Alliance des États du Sahel (AES), zu där Mali, Niger a Burkina Faso gehéieren, un d'Liicht bruecht ze hunn (kuckt hei an hei).

Dës dräi Länner, déi zënter enger Rëtsch Coup-d'Étate vu Militärregierunge regéiert ginn, kritiséieren den CFA-Franc hefteg, eng vun der franséischer Kolonialherrschaft geierft Wärung, déi si eegenen Aussoen no zu Gonschte vun enger neier Wärung opgi wëllen.

Dëse Faktencheck gouf vun RTL op Lëtzebuergesch iwwersat.