D'Prozesskäschte belafe sech op op d'mannst 9,5 Millioune Pond - ëmgerechent ronn 11 Milliounen Euro. Dat geet aus enger Decisioun vum Geriicht ervir, déi e Freideg publizéiert gouf.
Eng Rei berüümt Persounen haten dem Verlag "Daily Mail" an der "Mail on Sunday" virgeworf, mat Privatdetektive geschafft ze hunn, fir Autoen a Wunnengen ze "verwanzen". Och wieren Telefonsgespréicher illegal ofgelauschtert ginn. Déi Virwërf konnten d'Plaignanten dem Geriicht no awer net genuch beleeën.
Nieft dem Prënz Harry, haten ënnert anerem och de Popstar Elton John a säi Mann David Furnish, genee wéi d'Schauspillerinne Sadie Frost an Elizabeth Hurley geklot.
D'Zomm vu bal 10 Millioune Pond, déi d'Plaignante sollen iwwerhuelen, ass dem Geriicht no allerdéngs just eng virleefeg Zomm. D'Affekote vum Verlag hate gefuerdert, datt d'Géigesäit ee méi groussen Deel vun de Prozesskäschte vun ëmgerechent 45 Milliounen Euro soll iwwerhuelen, wéi normal.
