An der Affär ëm Verontreiung vu Suen zu Hesper waren en Dënschdeg d'Plaidoirie vun den Affekote vun den zwee Ugekloten.

Um leschten Dag vum Prozess em d'Verontreiung vu Gelder a Korruptioun op der Hesper Gemeng hat en Dënschdeg d'Defense d'Wuert. An déi huet, wat den ziville Volet ugeet, och eng gewësse Responsabilitéit bei der Gemeng an hire Mandataire gesinn.

Konkret geet et em d'Fro vum Schuedensersaz, deen d'Ugeklote missten bezuelen. Ronn 5,5 Milliounen Euro hunn d'Zivilparteien, also d'Gemeng an de hire Syndicat d'Initiative gefrot. Mä, erkläert de Marc Lentz, Affekot vum Haaptugekloten: "En Affer däerf net selwer zu sengem eegene Schued bäidroen, eng Négligence oder e Feeler gemaach hunn, fir datt en iwwerhaapt zustane komm ass."

De Jean-Paul Noesen, Affekot vum fréieren Techniker vun der Hesper Gemeng mengt awer, d'Kultur an der Hesper Gemeng hätt et den Ugeklote liicht gemaach, Suen ze hannerzéien: "Et ass e reng formale Kontroll gewiescht, ouni op d'Substanz anzegoen. A bis 2009 waren déi modern Kontrollmethoden, déi haut an all Betrib üblech sinn, op der Gemeng leider net present, dat huet déi Affär méiglech gemaach."

D'Ugekloten haten iwwer de Syndicat d'Initiative falsch Rechnungen un d'Gemeng ausgestallt. An de Marc Lentz fënnt, verschidde Saachen hätten einfach missten opfalen: "Wann iwwer 20 Joer Rechnunge bezuelt ginn, zum Beispill vun engem Syndikat, wat wéi ech gesot hunn, en Allround Talent war, well déi souwuel Kanaldeckelen, wéi Luuchte maachen, wéi Berieselungsanlagen an esou weider. Datt ee sech do net Froen stellt, wat ass de Syndikat do, wat verrechent deen do?"

D'Libëlleen op deene Rechnunge wiere komplett absurd gewiescht, hat de Jean-Paul en Dënschdeg an der Sitzung gesot. An deem Mooss, datt säi Client, den Techniker, den Haaptugekloten emol gefrot hätt, firwat en dat sou géing maachen. Doropshin hätt deen him geäntwert, dat misst ee grad esou maachen, well wann et besonnesch absurd wier, géif kee sech trauen, eng Fro ze stellen, aus Angscht, sech ze blaméieren.
Säi Client wier souwisou net de kreative Geescht, mä e rouege Bierger, mat enger ganz klenger krimineller Energie. De Parquet hätt a sengem Requisitoire komplett iwwerdriwwen: säi Client géing nees schaffen a sollt seng Strof ganz als Sursis kréien.

De Jean-Paul Noesen huet d'Geriicht och drop higewisen, datt d'Adress vun enger vun de Schäinfirmen, déi d'Ugeklote benotzt hunn, fir falsch Rechnungen ze schécken, 1, Rue du Fort Thüngen war, also am klenge Kueb um Kierchbierg, wou d'Verwaltungsgeriicht säi Sëtz huet. Och dat hätt missen engem opfalen, huet d'Defense gemengt.

De Marc Lentz huet vun enger gewësser Négligence geschwat, déi ënnert dem Buergermeeschter Marc Lies (CSV) senge Virgänger a Virgängerinnen zu Hesper geherrscht hätt. Säi Client huet ënnert anerem och staatlech Subsiden op säi Kont kasséiert, déi fir d'Gemeng oder de Syndicat d'Initiative geduecht waren. Dat hätt hien nëmme kënne maachen, well d'Gemeng d'Subsiden ënnert der Buergermeeschtesch Marie-Thérèse Gantenbein selwer net ugefrot hätt. "D'Demandë ware fondéiert, soss wiere se net ausbezuelt ginn", sou de Marc Lentz an der Sitzung, "et war just e Probleem mat der Kontosnummer." Datt d'Recettë vun der Gemeng do net gestëmmt hätten, hätt dem Schäfferot missen opfalen. Dee misst dofir suergen, datt seng Servicer fonctionéieren, sou den Affekot. An dat wier hei net geschitt.

De Goerges Pierret, deen d'Gemeng Hesper an de besote Syndicat d'Initiative vun de Hesper Gemeng als Zivilparteie vertrëtt, deelt déi Analyse net. Hie seet: "An dësem Dossier hei war et quasi onméiglech, datt d'Gemeng, d'Gemengeführung, d'Gestioun vun der Gemeng, de Schäfferot, dat déi dat konnte mierken. Et war esou detailléiert an esou präzis gemaach vu Leit, déi am Metier vun der Gemeng komplett dra waren." An dofir geet hien dovun aus, datt kee Feeler oder eng Négligence vun der Gemeng kéinten zréckbehale ginn.

De Maître Pierret hat dann och eng eendeiteg Meenung zu deenen 2 Ugekloten: "Et si ganz anstänneg Krimineller, fir dat do fäerdeg ze bréngen, iwwer 20 Joer skrupellos eng Gemeng esou unzeschmieren, dat ass ganz seriö. Mir sinn hei am ganz anstänneg Kriminellen derbäi. Hei ass net, wéi wann een am Cactus en Apel klaut. Mir sinn hei bei ganz schroer Kriminalitéit"

D'Urteel soll de 16. Mäerz geschwat ginn.