Fir den zweete Beamten, den Techniker, huet de Parquet 5 Joer a 6 Méint Prisong, dovu jeeweils d’Hallschent mat Sursis gefrot.

Am Prozess em den Detournement vu Suen op der Hesper Gemeng huet de Parquet de Moien laang Prisongsstrofe fir d’Haaptugekloten, zwee fréier Gemengebeamten, gefrot: 8 Joer respektiv 5 an en halleft Joer Prisong, jeeweils zur Hallschent mat Sursis.

De Vertrieder vum Parquet huet vu grave Faite geschwat, déi elo adequat bestrooft missten ginn. Déi zwee fréier Beamte sollen nieft de Prisongsstrofen d’Suen, déi si der Ëffentlechkeet geklaut hunn, zeréckbezuelen an säfteg Geldstrofe bezuelen. An fir eng Zäit en Deel vun hire biergerleche Rechter ewechgeholl kréien.

De Vertrieder vum Parquet huet ënnerstrach, datt sech d’Faiten iwwer eng "extrem laang" Zäit, bal 20 Joer zéien, datt de Schued mat ronn fënnef Milliounen Euro "extrem héich" wär, an datt déi zwee fréier Beamten, mat "extremer Facilitéit" an ouni vill Skrupel virgaange wieren.

Graff vereinfacht hu si zesumme geschafft, fir falsch Rechnunge vu fiktive Firmen un d’Gemeng auszestellen, z’approuvéieren a bezuelen ze loossen a sech d’Suen ënnertenee gedeelt.

Donieft hat jidderee vun deenen zwee nach eegen Affäre lafen. Dem fréiere Finanzchef gëtt virgeheit, och Subsiden un d’Gemeng an de Syndicat d’initative detournéiert ze hunn. De fréieren Techniker huet iwwerdeems de matugekloten Entrepreneur gefrot, fir Facture fir säi Privatchantier un d’Gemeng ze verrechnen. Sou huet d’Gemeng fir säi neit Haus Gaardemiwwel am Wäert vu 15.000 Euro bezuelt. Den Entrepreneur wier dorop agaangen, well hien Angscht gehat hätt, soss keng Opträg méi vun der Gemeng ze kréien. Dat sot hien e Méindeg viru Geriicht. Fir hien huet de Parquet wéinst Korruptioun 18 Méint Prisong gefrot, déi integral mat Sursis kéinte versi ginn.

Den fréie Gemengentechniker eleng soll alles an allem eng Millioun Euro an d’Täsch gestach hunn. Hien hätt d’Suen a säi Stot gestach a net op de Su gekuckt, wann en akafe goung. Sou sot hie viru Geriicht.

Hien huet sech selwer als liicht beaflossbar duergestallt, als jonk an irresponsabel, wéi d’Fälschungen lass goungen an als Alkoholiker. Gäre wier um Büro "mol eng Fläsch Wäin geknackt" ginn. Hie wier vill ugeeckt bei anere Leit. Just mam Haaptugekloten hätt hien eng frëndschaftlech a kollegial Relatioun gehat. Si wieren zesummen an de Fitness gaangen a mëttes zesummen iessen. Hien huet oft widderholl, et géif him leed doen, wat e gemaach hätt. En hätt jo gutt verdéngt a säi Liewe muttwëlleg ruinéiert.

De Vertrieder vum Parquet huet kee gutt Bild vun deenen zwee fréiere Beamte gezeechent. Si hätte vum horaire mobile abuséiert, oft onentschëllegt gefeelt. De fréiere Finanzchef hätt wuel 300.000 Euro d’Joer verdéngt, mä zwee Drëttel dovun illegal. En Deel dovun hätt en an d’Cabarete gedroen. Seng Ausso wier "surrealistesch" gewiescht an hien hätt d’Gefill, den Haaptugekloten hätt "komplett de Bezuch zur Realitéit verluer", sou de Vertrieder vum Parquet. Iwwert den fréieren Techniker sot hien, dee géif sech zwar als Affer duerstellen. Mä him wier keen eemolege Feeler geschitt. En hätt iwwer laang Joren de System matgemaach. An e wier sengersäits wuel queesch gewiescht, wéi en 2019 spatz kritt hätt, datt säi Kolleeg sech vill méi Sue geholl hat. Wéi d’Affär opgeflunn ass, hat e senger Partnerin eng SMS geschriwwen, e wier "mega gelénkt" ginn.

De Prozess geet en Dënschdeg mat de Plaidoirie vun der Defense weider.

Prozess Hesper / Reportage Michèle Sinner