Grad de Covid, ma och d'Gripp an den RS-Virus si momentan am Ëmlaf.

Krankheeten um Kommen / Reportage Annick Goerens

An de Praxisse vun den Dokteren ass den Ament vill lass, well vill Leit erkaalt sinn. Och d’Santé huet déi lescht Wochen eng Hausse vun den Otemweeerkrankunge festgestallt. Aussergewéinlech fir dës Joreszäit ass dat net, sot e Freideg de Moien den Dr. Marc Trierweiler. Am Centre médical zu Hesper wieren 80 bis 90 Prozent vun de Patiente mat Erkältungskrankheete geplot; also Kappwéi, Péng an de Glidder, Houscht a Schnapp. De Covid géing och nees staark zirkuléieren.

"Déi meescht Léit ginn net méi sou staark krank, wéi dat vläicht deelweis am Ufank war, sou dass déi grouss Panik vläicht net gerechtfäerdegt ass. Mä et sinn awer ëmmer nees Leit, déi et e bësse méi staark erwëscht, déi deelweis am Spidol musse behandelt ginn. Och dat hänkt vill vun de Risikofacteuren of, déi d'Leit scho mat sech bréngen."

Extrait Dr. Trierweiler

Wéi kann een sech dann elo preventiv schützen?

"Also déi Gestes barrières, iwwer déi mer virun 3-4 Joer jo vill geschwat hunn, déi sinn ëmmer nach up-to-date. Wann ee sech reegelméisseg d'Hänn wäscht, dréit een de Virus net sou schnell bei déi aner Leit. Néitschen an houschten, éischter an den Ielebou an net an de fräie Raum. Mask undoen, wann een ënner grousse Mënschemassen ass. Alles dat hëlleft haut och nach. Wann ee selwer krank ass, soll een da virun allem vläicht Kontakter, déi net musse sinn, vermeiden. Wann ee staark selwer infizéiert ass, vläicht net d'Bomi an d'Altersheim besiche goen."

D'Impfung wier natierlech e grousst Thema. Si géingen dat recommandéiere fir Leit, déi iwwer 65 Joer al sinn a fir Leit, déi Niewenerkrankungen hunn, wéi chronesch Bronchite, Diabetes, Häerz-Longe-Problemer. Alles wat de Verlaf ka verschlëmmeren, deene recommandéiere mer schonn sech impfen ze loossen, sou den Dr Marc Trierweiler.